އިޒުރޭލުގެ ކުރީގެ ދިފާއީ ވަޒީރު ޔޮއާވް ގަލަންޓް ހައްޔަރުކުރުަމަށް އިންޓަނޭޝަނަލް ކްރިމިނަލް ކޯޓު (އައިސީސީ) އިން އަމުރެއް ނެރެފައި އޮއްވައި، އޭނާ އެމެރިކާއަށް ވަޑައިގަތުމަށް ނިންމަވައިފި އެވެ.
އައިސީސީން ނެރުނު އަމުރަށް އެމެރިކާ އޮތީ ދެކޮޅު ހަދާފަ އެވެ. މިހެންކަމުން ގަލަންޓް ހައްޔަރުކުރުމާ ބެހޭ ގޮތުން އެމެރިކާއިން އެއްވެސް ކަމެއް ނުކުރާނެ އެވެ. އެމެރިކާ އަކީ އިޒުރޭލާއި، އިޒުރޭލުގެ ވެރިންގެ ދިފާއުގައި ވަރަށް ބޮޑަށް ވަކާލާތުކުރާ ގައުމެކެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ގަލަންޓް ހައްޔަރުކުރަން އައިސީސީން އަމުރު ނެރުނީ، އިޒުރޭލުން ޣައްޒާގައި ހިންގަމުންދާ ޖަރީމާތަކަށް އިޒުރޭލު ސަރުކާރު ޒިންމަވާން ޖެހޭނެ ކަމަށް ބުނެ އެވެ.
ޣައްޒާގައި ޔަހޫދީން ހިންގަމުންދަނީ ގަތުލުއާންމެއް ކަމަށްވެސް އައިސީސީން ބުނެ އެވެ. އަދި ނަތަންޔާހޫ އާއި ގަލަންޓަށް ދައުވާކުރުމަށް އިތުރު ހެއްކަކަށް ބޭނުންނުވާ ވަރަށް ހެކި ލިބިފައި ހުރި ކަމަށްވެސް އަައިސީސީން ބުންޏެވެ.
އިޒުރޭލުގެ އަސްކަރީ ރޭޑިއޯއިން ބުނާ ގޮތުން ގަލަންޓް އެމެރިކާއަށް ވަޑައިގަންނަވަނީ އެމެރިކާގެ ދިފާއީ ވެރިންނާ މަޝްވަރާ ކުރެއްވުމަށެވެ.
ދިފާއީ ވަޒީރުގެ މަގާމު ގަލަންޓަށް މިހާރު ގެއްލިފައިވާއިރު، އެމެރިކާގައި ދިފާއީ މަޝްވަރާތަކެއް ކުރެއްވުމުގެ ބޭނުމަކީ ކޮބައިކަމާ މެދު ސުވާލު އުފެދެ އެވެ.
ބެލެވޭ ގޮތުގައި އެމެރިކާއިން ބޭނުންވަނީ ޣައްޒާ ހަނގުރާމައިގެ ތެރޭގައި ކަން ހިނގައިދިޔަ ގޮތް އޮޅުންފިލުވާށެވެ.
އިޒުރޭލުގެ ރޭވުންތަކާއި އަދި އެމެރިކާއިން ދިން އިރުޝާދުގެ ސަބަބުން ލިބުނު ކުރިއެރުންތައް ބަލައި -- އިޒުރޭލަށް ދިމާވެދާނެ ހަމަނުޖެހުންތަކުގައި ކުރިއާލައި ތައްޔާރުވުމާ މެދުވެސް އެމެރިކާއިން މަޝްވަރާކޮށްފާނެ އެވެ.
ނަތަންޔާހޫއާ ގަލަންޓް ހައްޔަރުކުރުމުގެ އަމުރަކަށް އެދިވަޑައިގެން އައިސީސީގެ ޕްރޮސެކިއުޓަރު ކަރީމް ޚާން ހުށަހެޅުއްވީ ފާއިތުވި މެއި މަހު އެވެ.
އައިސީސީން ނެރުނު އަމުރުގައި ބުނެފައިވަނީ ނަތަންޔާހޫ އާއި ގަލަންޓް ހައްޔަރުކުރަން އަމުރު ނެރުނީ އެ ދެ މީހުންނާ ދެކޮޅަށް އެކަށީގެންވާ ހެކި ހުރުމުން ކަމަށެވެ.
އިޒުރޭލުގެ އަސްކަރިއްޔާ އިން ޣައްޒާގައި ހިންގަމުންދާ ޖަރީމާތަކަށް އިޒުރޭލުގެ ވެރިން ޒިންމާވާން ޖެހިވަޑައިގަންވާ ކަމަށްވެސް އައިސީސީގެ އަމުރުގައި އޮތީ ބުނެފަ އެވެ.