އެންޓިގުއާ އެންޑް ބާބިއުޑާގައި އަންނަ އަހަރު ބާއްވާ ކޮންފަރެންސް އޮފް ސްމޯލް އައިލެންޑް ޑިވެލޮޕްމަންޓް ސްޓޭޓްސް (ސިޑްސް)ގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒަށް ދައުވަތު ދެއްވައިފި އެވެ.
ކުދި ޖަޒީރާ ގައުމުތަކުގެ ކޮންފަރެސް -- ސިޑްސް އަންނަ އަހަރުގެ މެއި މަހު ބޭއްވުމަށް ހަމަޖެހިފައިވަނީ އެންޓިގުއާ އެންޑް ބާބިއުޑާ ގައެވެ.
މިކޮންފަރެންސްގެ ދައުވަތު ރައީސް މުއިއްޒަށް އެރުވީ ކޮޕް 28 ސަމިޓްގައި ހަވާސާގައި އެންޓިގުއާ އެންޑް ބާބިއުޑާގެ ބޮޑުވަޒީރު ގެސްޓޮން ބްރައުންއާ އެކު ބޭއްވެވި ބައްދަލުކުރެއްވުމުގައެވެ.
މިބައްދަލުކުރެއްވުމުގައި މައިގަނޑު ގޮތެއްގައި ދެ ބޭފުޅުން މަޝްވަރާ ކުރެއްވީ ތަރައްގީވަމުންދާ ކުދި ޖަޒީރާ ގައުމުތަކުން އިސްކަންދޭ ދާއިރާތައް ކަމަށްވާ ތިމާވެށްޓާއި، މޫސުމަށް އަންނަ ބަދަލުތަކާއި، ފަތުރުވެރިކަމުގެ ދާއިރާއިން އެއް ގައުމު އަނެއް ގައުމަށް އެއްބާރުލުން ދިނުމާ ގުޅޭގޮތުންނެވެ.
ދެ ބޭފުޅުން މި ބައްދަލުކުރެއްވުން ނިންމަވާލެއްވީ ދެ ގައުމުގެ ދެމެދުގައި އިތުރަށް އެއްބާރުލުން އިތުރުކުރުމަށް ޝައުގުވެރިކަން ފާޅުކުރެއްވުމަށްފަހު އެވެ.
ދިވެހިރާއްޖެ އާއި އެންޓިގުއާ އެންޑް ބާބިއުޑާއާ ދެމެދު ސިޔާސީ ގުޅުން ގާއިމުކުރީ މާޗް 25، 2002 ގައެވެ.