އައްޑޫ ޕޮލިސް އެކަޑެމީ ހިންގުމުގައި އިސްކޮށް ހުންނެވި ޗީފް ސްޕްރިންޓެންޑެންޓް އޮފް ޕޮލިސް އަހްމަދު ޝިފާން، ޕޮލިސް ކޮމިޝަނަރު ބިއުރޯގެ ވެރިޔަކަށް ހަމަޖައްސައިފި އެވެ.
މިބަދަލު ގެނެސްފައިވާ ކަމަށް ފުލުހުންގެ ބައެއް އިސް ބޭފުޅުންގެ ފަރާތުން އަވަސް އަށް ވަނީ ޔަގީންވެފަ އެވެ.
ޕޮލިސް ކޮމިޝަނަރު ބިއުރޯ ނުވަތަ ހެޑް އޮފް އޮފީސް އޮފް ކޮމިޝަނަރުގެ ޒިންމާ މިދިޔަ ދުވަސްތަކުގައި އަދާކުރެއްވީ އެސިސްޓެންޓް ކޮމިޝަނަރު އޮފް ޕޮލިސް ޔޫނުސް ސޮބާހު އެވެ.
ޝިފާން އާއި ޔޫނުސްގެ މަގާމުގެ ޒިންމާއާއި މަސްއޫލިއްޔަތަށް ބަދަލު ގެނައި ސަބަބެއް ސާފެއް ނުވި އެވެ.
ރައީސް ޑރ. މުހައްމަދު ވަހީދާއި ރައީސް އަބްދުﷲ ޔާމީންގެ ވެރިކަމުގައި ޝިފާން އަކީ ފުލުހުންގެ ތަރުޖަމާނެއްގެ ގޮތުގައި މަސައްކަތް ކުރެއްވި ބޭފުޅެކެވެ.
އައްޑޫ ޕޮލިސް ސްޓޭޝަންގައި ކުރިންވެސް މަސައްކަތް ކުރައްވާފައިވާ ޔޫނުސް 2013 ވަނަ އަހަރުގެ ތެރޭގައި ފުލުހުންގެ ހިދުމަތުން ދުވަސްކޮޅަކަށް ވަކިވި އެވެ. އެކަމަކު ރައީސް އިބްރާހީމް މުހައްމަދު ސޯލިހްގެ ވެރިކަމުގައި އަލުން ފުލުހުންގެ ހިދުމަތާ އަލުން ގުޅިވަޑައިގަތީ އެވެ.