ފިނޭންސް މިނިސްޓްރީން އާންމުކޮށްފައިވާ ވީކްލީ ފިސްކަލް ޑިވެލޮޕްމަންޓްސް ރިޕޯޓުގައި މިއަހަރުގެ ނޮވެމްބަރު 17 އިން 30ގެ ނިޔަލަށް ގެއްލުމުގެ ބަދަލުގެ ގޮތުގައި އެކި ފަރާތްތަކަށް 101.7 މިލިއަން ރުފިޔާ ދޭންޖެހިފައިވާ ކަމަށް ރިޕޯޓް ކުރި ނަމަވެސް އެ ފައިސާ އަދި މިހާތަނަށް ދޫކޮށްފައި ނުވާ ކަމަށް އެ މިނިސްޓްރީން ހާމަކޮށްފި އެވެ.
ފިނޭންސް މިނިސްޓްރީން މިކަން ހާމަކޮށްފައި މިވަނީ ނޮވެމްބަރު 17 އިން ނޮވެމްބަރު 30 އަށް ސަރުކާރުން ބަދަލުގެ ގޮތުގައި 101.7 މިލިއަން ރުފިޔާ ދޫކުރަން ނިންމާ އެ މިނިސްޓްރީގެ ވީކްލީ ފިސްކަލް ޑިވެލޮޕްމަންޓްސް ރިޕޯޓްގައި ހިމަނާފައިވާތީ "އަވަސް" އިން ލިޔުނު ހަބަރަކާ ގުޅިގެންނެވެ.
ފިނޭންސް މިނިސްޓްރީން މިރޭ ނެރުނު ބަޔާނެއްގައި ބުނެފައިވަނީ ވީކްލީ ފިސްކަލް ޑިވެލޮޕްމަންޓް ރިޕޯޓުގައި ގެއްލުމުގެ ބަދަލުގެ ގޮތުގައި 101.7 މިލިއަން ރުފިޔާ ރިޕޯޓް ކޮށްފައިވީ ނަމަވެސް އެ ފައިސާއަކީ އަދި މިހާތަނަށް ދޫކޮށްފައިވާ ނުވަތަ ޕޭމަންޓް ޕްރޮސެސްކޮށްފައިވާ ފައިސާ ނޫން ކަމަށެވެ.
"ވީކްލީ ފިސްކަލް ޑިވެލޮޕްމަންޓްސް ރިޕޯޓުން ފެންނަ އަދަދަކީ އިންޓަނޭޝަނަލް އާބިޓްރޭޝަންއަކާ ގުޅިގެން އެ "ޓްރާންސެކްޝަން" ޕަބްލިކް އެކައުންޓިން ސިސްޓަމަށް ޕޯސްޓްކުރުމުން ރިޕޯޓު ކުރެވިފައިވާ އަދަދެކެވެ،" ފިނޭންސް މިނިސްޓްރީގެ ބަޔާނުގައި ބުނެފައިވެ އެވެ.
މިބަޔާނުގައި ބުނެފައިވާ ގޮތުން ނޮވެމްބަރު 17 ގައި މި ސަރުކާރު ވެރިކަމާހަވާލުވިއިރު ގެއްލުމުގެ ބަދަލުގެ ގޮތުގައި އެކި ފަރާތްތަކަށް ދައުލަތުގެ ބަޖެޓުން ހަރަދުކުރުމަށް ނިންމާފައިވާ ނިންމުންތަކުގެ އިތުރުން އިންޓަނޭޝަނަލް އާބިޓްރޭޝަނުން ދައުލަތާ ދެކޮޅަށް ނިންމާފައިވާ މައްސަލަތަކާ ގުޅިގެން ބައެއް ފަރާތްތަކަށް ވަނީ ފައިސާ ދޫކުރަން ނިންމާފަ އެވެ.
މީގެ ތެރޭގައި ބައިބަޔަށް ބަހާލައިގެން ފައިސާ ދެއްކުމަށް ނިންމާފައިވާ ނިންމުންތައްވެސް ހިމެނޭ ކަމަށް ބަޔާނުގައިވެ އެވެ.
ފިނޭންސް މިނިސްޓްރީން އިތުރަށް ބުނީ ބައެއް ފަރާތްތަކަށް ބައެއް ސެޓްލްމަންޓްތަކުގެ ޕާޓް ޕޭމަންޓްވެސް ވަނީ ހަދާފައި ކަމަށެވެ. ނަަމަވެސް މި ސަރުކާރު ހަވާލުވުމަށްފަހު ގެއްލުމުގެ ބަދަލު ނަގާ ދިނުމަށް ކުރިން އުފައްދާފައިވާ ސެޓްލްމަންޓް ކޮމިޓީ އުވާލައި އެ ކޮމިޓީން ބެލި މައްސަލަތައް ބަންޑާރަނައިބުގެ ލަފައާއެކު އަލުން މުރާޖައާ ކުރުމުގެ މަސައްކަތް ކުރަމުންދާ ކަމަށް ބުނެފައިވެ އެވެ.
ވީކްލީ ފިސްކަލް ޑިވެލޮޕްމަންޓްސް ރިޕޯޓްތައް ދައްކާ ގޮތުން މިއަހަރުގެ ޖެނުއަރީ އެއްވަނަ ދުވަހުން ފެށިގެން ނޮވެމްބަރު 30ގެ ނިޔަލަށް ބަދަލުގެ ގޮތުގައި ޖުމްލަ 539.8 މިލިއަން ރުފިޔާ ދޫކުރަން ނިންމާފައިވެ އެވެ. މީގެތެރެއިން 438.1 މިލިއަން ރުފިޔާ ވަނީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ނޮވެމްބަރު 16 ވަނަ ދުވަހުގެ ނިޔަލަށް ދޫކޮށް ނިންމާފަ އެވެ.
ދައުލަތުގެ މިއަހަރުގެ ބަޖެޓުގައި ބަދަލު ދޭން މިއަހަރަށް ކަނޑައެޅީ 101.2 މިލިއަން ރުފިޔާ އެވެ.