އެމްޑީޕީގައި ތިއްބެވި ބައެއް މަޖިލިސް މެންބަރުންގެ ތެރޭގައި އެބޭފުޅުންގެ އިނގިލި ބުރިކޮށްލިޔަސް އެމަނިކުފާނާ ދެކޮޅަށް މަސައްކަތް ނުކުރައްވާނެ މަޖިލިސް މެންބަރުންތަކެއް އަދިވެސް އެމްޑީޕީގައި އެބަތިއްބެވި ކަމަށް ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ އެމްޑީޕީގެ 13 މެންބަރަކު ޕީއެންސީއަށް ސޮއި ކުރެއްވުމަށް މިރޭ ދަރުބާރުގޭގައި ބޭއްވި ޖަލްސާގައި ވާހަކަދައްކަވަމުންނެވެ.
ރައީސް ވިދާޅުވީ އެމްޑީޕީގެ މަޖިލިސް ބައެއް މެންބަރުން ޕީއެންސީއަށް އަދި ސޮއި ނުކުރެއްވި ނަމަވެސް އޭގެތެރެއިން ބައެއް މެންބަރުން ތިއްބެވީ އެމަނިކުފާނާ އެކު ކަމަށެވެ. އެ މެންބަރުން ތިއްބެވީ ވަރުގަދަ އަޒުމެއްގައި އަދި އިނގިލި ބުރިކޮށްލިޔަސް އެމަނިކުފާނާ ދެކޮޅު ނުވާ ގޮތަށް ކަމަށްވެސް ވިދާޅުވި އެވެ.
"އެކި ސަބަބުތަކަށްޓަކައި، މަސްލަހަތަށްޓަކައި އަޅުގަނޑުމެންނާ ފާޅުގައި ގުޅިވަޑައި ނުގެންނެވި އަޅުގަނޑަށް ޕާސަނަލީ، އަމިއްލަ ހައިސިއްޔަތުން އެނގޭ، ހަމަ އެމްޑީޕީ މަޖިލިސް މެމްބަރުން އެބަ ތިއްބެވި އެމްޑީޕީ ޕީޖީ ގްރޫޕުގައި މަޑު ކުރައްވައިގެން ތިއްބެވި ބޭފުޅުންވެސް،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެމްޑީޕީގެ 13 މެންބަރުން މިރޭ ޕީއެންސީއަށް ސޮއިކުރެއްވުމާ ގުޅިގެން އެކަމުން ހިތްވަރު ލިބިވަޑައިގެން އެމްޑީޕީގެ އިތުރު މެންބަރުން އަދިވެސް ޕީއެންސީއާ ގުޅިވަޑައިގަންނަވާނެ ކަމަށް އުއްމީދުކުރައްވާ ކަމަށެވެ.
"އެކަމުގެ އުއްމީދުގައި އަޅުގަނޑުމެން ތިބި ވާހަކަ ދަންނަވަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެމްޑީޕީގެ މެންބަރުންތަކެއް މިރޭ ޕީއެންސީއާ ގުޅިވަޑައިގަތުމާ އެކު އެ ބޭފުޅުންނާ ގުޅޭގޮތުންވެސް ދޮގު ވާހަކަތައް ފަތުރާނެ ކަމަށެވެ. ނަމަވެސް ރައީސް ޔަގީންކަން ދެއްވީ އެމްޑީޕީގެ މެންބަރުން ޕީއެންސީއާ ގުޅިވަޑައިގަތީ ގައުމުގެ ހައްގުގައި ކަމެވެ. އެކަމަށްޓަކައި ރައީސް ވަނީ އެ މެންބަރުންނަށް ޝުކުރުވެސް އަދާކުރައްވާފަ އެވެ.