އިންޑިއާގެ ޖުމްހޫރީ ދުވަސް ފާހަގަކުރުމަށް ބޭއްވި ހަފުލާއަށް ސަރުކާރުގެ އިސްވެރިން ވަޑައިނުގެންނެވި އެވެ.
އެ ގައުމުގެ 75 ވަނަ ޖުމްހޫރީ ދުވަސް ފާހަގަކުރުމަށް ރާއްޖޭގައި ހުންނަ އެގައުމުގެ ހައިކޮމިޝަނުން ރޭ ހޮޓެލް ޖެންގައި ބޭއްވި ހަފުލާއަށް ސަރުކާރުގެ އިސްވެރިންނަށް ވަނީ ދައުވަތު ދެއްވާފަ އެވެ.
ރައީސް އޮފީހުގެ އޮފިޝަލަކު ވިދާޅުވި ގޮތުގައި ސަރުކާރުގެ އިސްވެރިންނަށް އެ ހަފުލާގައި ބައިވެރިވެވަޑައިނުގެންނެވުނީ "ވަގުތު ނުވެގެން" ނެވެ.
މި ހަފުލާ ޝަރަފުވެރިކޮށްދެއްވީ ފޮރިން މިނިސްޓްރީގެ ސްޓޭޓް މިނިސްޓަރު ޝެރީން އަބްދުލްސަމަދެވެ.
މި ހަފުލާގައި ކުރީގެ ރައީސް އިބްރާހީމް މުހައްމަދު ސޯލިހާއި ޑރ. މުހައްމަދު ވަހީދު ހަސަން މަނިކުގެ އިތުރުން އުއްތަމަ ފަނޑިޔާރު މުއުތަސިމް އަދުނާނާއި މާލޭގެ މޭޔަރު އާދަމް އާޒިމް ބައިވެރިވެވަޑައިގެންނެވި އެވެ.
އިންޑިއާގެ ޖުމްހޫރީ ދުވަސް ފާހަގަކުރުމަށް މީގެ ކުރިން ބޭއްވި ހަފުލާތަކުގައި ސަރުކާރުގެ އިސްވެރިން ބައިވެރިވެވަޑައިގަންނަވަ އެވެ.