އަވަސް އަރުވާލައިގެން ގެއިން ނުކުންނަތަނުން މީހަކާ މުޑިއަރައި ވެއްޓިދާނެ އެވެ. ސައިކަލުން ފޭބުމަށް ނަގާ ފައިން މީހެއްގެ ގައިގައި ޖެހިދާނެ އެވެ. ނުބައި ނަމްބަރަކަށް ގުޅިދާނެ އެވެ. މީހަކު ދެއްކި ވާހަކައެއް ސާފުނުވެގެން ދެ ވަނަ ފަހަރަށް ރިޕީޓްކުރަން ވެސް ބުނެވިދާނެ އެވެ. މީހަކު ބުނި ކަމެއް ނުކޮށްދެވިދާނެ އެވެ. ލޯބިވެރިޔާ ބަލައި ގަޑިއަށް ތަނަކަށް ނުދެވިދާނެ އެވެ.
މި ނޫން ވެސް އަދި އެތައް ބައިވަރު މިފަދަ އެހެން ހާލަތްތަކެވެ. އެކަމަކު ފާހަގަކޮށްލަން ޖެހެނީ މިފަދަ ކޮންމެ ހާލަތެއްގައި ވެސް ތިމާއާ އެންމެ ރައްޓެހި ބަހަކަށް ވެފައި މި އޮންނަނީ "ސޮރީ" ކަމެވެ. މި ވާހަކައެއް ދެއްކީމަ ބަހުގެ އެކަޑެމީ އިން ބަޔާނެއް ވެސް ނެރެލަފާނެ އެވެ. އެކަމަކު ބަހުގެ އެކަޑެމީ އަށް ނަން ދީފައިވާ ގޮތުން ތިޔަ އެކަޑެމީ އަކަށް ވެސް މީހުން ބުނާނީ "ސޮރީ" އޭ ނޫންތޯ އެވެ؟
ކޮންމެއަކަސް އެ ވާހަކައެއް ނޫނެވެ. އާންމު ދިރިއުޅުމުގައި "ސޮރީ" އަކީ ކިހާ ބޮޑު ބައިވެރިއެއް ހެއްޔެވެ؟ ކިހާ އާންމުކޮށް ބޭނުންކުރެވޭ ބަހެއް ހެއްޔެވެ؟ ދުވަސް ފެށިގެން ގޮސް އިރު އޮއްސި އެނދަށް ވެއްޓިގަތުމުގެ ކުރިން ކިތައް ފަހަރު މައާފަށް އެދެވޭ ހެއްޔެވެ؟ ނުވަތަ ސޮރީއޭ ބުނެވޭ ހެއްޔެވެ؟
މިފަހުން ކުރި ދިރާސާއަކުން އެނގުނު ގޮތުން އެންމެ ގިނައިން "ސޮރީ، މި ބަސް ބޭނުންކުރަނީ އިނގިރޭސި ވިލާތު މީހުންނެވެ. ދުނިޔޭގެ އެހެން އެއްވެސް ތަނެއްގައި ބަޔަކު މީހުން "މައާފަށް" ނޭނދޭ ވަރަށް "ސޮރީއޭ" ބުނާ ބަޔަކީ އިނގިރޭސިންނެވެ. އިނގިރޭސި ވިލާތުގެ މީހުންގެ މެދުގައި މިކަން މަޝްހޫރުވެފައި އޮންނަނީ އެމީހުންގެ ރިވެތި އަހުލާގާއި ސަގާފަތުގެ ބައެއްގެ ގޮތުގައިކަން ވެސް ފާހަގަކޮށްލަން ޖެހެ އެވެ.
ދިރާސާ އިން ދައްކާ ގޮތުން ދުވާލެއްގެ މައްޗަށް އިނގިރޭސި ވިލާތުގެ މީހަކު އާންމުކޮށް "ސޮރީ" ، މި ބަސް ބޭނުންކުރާ އަދަދު އަށަކަށް އަރަ އެވެ. އަދި ކޮންމެ އަށް މީހަކުން އެކަކަކީ "ސޮރީ" އޭ ބުނެ އެހެން މީހުންގެ ކިބައިން ދުވާލެއްގެ މައްޗަށް 20 ފަހަރު މައާފަށް އެދޭ މީހެކެވެ.
ފާހަގަކޮށްލަން ޖެހެނީ ކަމެއް ދިމާވެގެން މައްސަލައެއް ނެތަސް އިނގިރޭސި ވިލާތު މީހާއަށް "ސޮރީއޭ" ބުނެނުލައި އެތަނަކުން ނުދެވޭ ކަމެވެ.
ދިރާސާތަކުން ދައްކާ ގޮތުން "ސޮރީއޭ" ބުނެ މައާފަށް އެދުމުގެ ރޭހުގައި އިނގިރޭސިންނާ އެންމެ ގާތްކުރަނީ ކެނެޑާ އެވެ. ކެނެޑާ ފަހަތުން މި އުޅެނީ އެމެރިކާ އެވެ. މި ލިސްޓެއްގައި އިނގިރޭސި ވިލާތާއި އެމެރިކާ އޮތުމުން މިކަން ސިޔާސީކޮށްލާ ބަޔަކު ވެސް އެބައުޅެ އެވެ.
އެމީހުން ބުނަނީ ދުނިޔެ ހަލާކުކޮށް ސުނާފަތިކުރަމުން އަންނަ ބަޔަކީ އެމެރިކާ އާއި އިނގިރޭސި ވިލާތް ކަމަށްވާއިރު އެމީހުން ގިނަގިނައިން މައާފަށް އެދެން ޖެހޭނެ ކަމަށާއި އެކަން އެގޮތަށް އޮތުމުން "ސޮރީއޭ" ބުނަން އާދަވެފައި ވަނީ ކަމަށެވެ. ޔަގީނަށް ވެސް އެއީ ރަނގަޅު ސަމާސާއެކެވެ.
ސޮރީއަކުން މައާފަށް އެދޭ ރޭޓަށް އަދި ހާލަތްތަކަށް ބަލާއިރު އިނގިރޭސި ވިލާތާއި އެމެރިކާގެ މީހުން "ސޮރީ" ބޭނުން ކުރާ ތަފާތުވެ އެވެ. މިސާލަކަށް ބައްދަލުވުމަކަށް ގަޑިޖެހިގެން ދެވިއްޖެ ނަމަ އިނގިރޭސި ވިލާތުގައި މައާފަށް އެދޭ މީހުންގެ ނިސްބަތް 84 ޕަސެންޓަށް އަރަ އެވެ. އެފަދަ ހާލަތެއްގައި "ސޮރީއޭ" ބުނެލާ އެމެރިކާގެ މީހުންގެ ނިސްބަތަކީ 74 ޕަސެންޓެވެ.
މި "ސޮރީ" އެއްގެ ވާހަކަ ދިވެހި މުޖުތަމަ އަށް އެޕްލައިކޮށްފި ނަމަ އެންމެ ގިނަ ބަޔަކު "ސޮރީ" އޭ ބުނާނީ ކޮންކަމަކާ ގުޅުވައިގެން ހެއްޔެވެ؟
