ރާއްޖޭގެ އަމިއްލަ އެއާލައިނެއް ކަމަށްވާ މަންޓާ އެއާ އިން އިންޑިއާގެ ބެންގަލޫރާއި ރާއްޖޭގެ ދ. ކުޑަހުވަދޫއާއި ދެމެދު ކުރާ ދަތުރުގެ ޓިކެޓް އަގަކަށް 350 ޑޮލަރު -- 5،397 ރުފިޔާ ކަނޑައަޅައި ޓިކެޓް ވިއްކަން ފަށައިފި އެވެ.
މަންޓާ އެއާ އިން ބުނީ ދެ ގަޑިއިރާއި 50 މިނެޓްގެ މިދަތުރުތަކުގައި ޕެސެންޖަރުންނަށް ހާއްސަ ފެއާއެއް އޮންނާނެ ކަމަށާއި ދަތުރުގައި ހާއްސަ ކެއުމެއްވެސް ލިބޭނެ ކަމަށެވެ.
ދ. އަތޮޅާއި އެ ސަރަހައްދުގައި ޓޫރިޒަމް ފުޅާކުރުމަށް އަމާޒު ހިފައިގެން ފަށާ މިދަތުރުތަކުގެ ހާއްސަ ފެއާ ކުރިއަށްދާނީ އަންނަ މަހުގެ އެކަކުން 15 އަށެވެ.
މަންޓާ އެއާގެ އިންޓަނޭޝަނަލް ދަތުރުތައް ފެށުމަށްޓަކައި އެ އެއާލައިންގެ ފުރަތަމަ ބޯޓު ރާއްޖެ އައީ މިމަހުގެ 16 ވަނަ ދުވަހު އެވެ.
މަންޓާ އެއާ އިން ހިންގާ ބަލަހައްޓާ ދާލު އެއާޕޯޓަކީ މަންޓާގެ ބައިނަލްއަގްވާމީ ދަތުރުތައް ފެށުމަށް ބޭނުންކުރާނެ މައި އެއާޕޯޓެވެ.
މަންޓާ އެއާ އިން ނިންމާފައިވަނީ މާޗް އެއްވަނަ ދުވަހުން ފެށިގެން ކޮންމެ ހަފްތާ އަކު އާދިއްތަ، އަންގާރަ އަދި ހުކުރު ދުވަހު ކުޑަހުވަދޫ އިން ބެންގަލޫރަށް އަދި ބެންގަލޫރުން ކުޑަހުވަދޫ އަށް ސީދާ ދަތުރުތައް ކުރިއަށް ގެންދިއުމަށެވެ.
މިދަތުރުތައް ފެށުމުން ދ. އަތޮޅު ކައިރީގައި ހިންގާ ރިސޯޓްތަކާއި އެ ސަރަހައްދުގައި ދިރިއުޅޭ ދިވެހިންނަށް މާލެ ނައިސް ސީދާ ދާލު އެއާޕޯޓުން އިންޑިއާއަށް ދަތުރުކުރެވޭނެ އެވެ.
މަންޓާ އެއާ އިން ގެންދަނީ އިންޑިއާ އަށް ދަތުރުތައް ފެށުމަށްފަހު އަވަށްޓެރި ސްރީލަންކާއަށް ވެސް ދަތުރުތައް ފެށުމަށް ތައްޔާރުވަމުންނެވެ.
މަންޓާ އެއާ އިން މިވަގުތު ޑޮމެސްޓިކް ދަތުރުތައް ކުރަނީ ވެލާނާ އިންޓަނޭޝަނަލް އެއާޕޯޓުން ދ. ކުޑަހުވަދޫއަށާއި ބ. ދަރަވަންދޫއަށެވެ. މަންޓާ އެއާގެ ސީޕްލޭން ތަކުން ޝެޑިއުލް ދަތުރުތައް ރިސޯޓުތަކަށް ވެސް ކޮށްދެ އެވެ.