އެލައިޑް އިންޝުއަރެންސްގެ 39 ވަނަ އަހަރީ ދުވަހާއި ގުޅިގެން އެ ކުންފުނިން ހާއްސަ ގިވްއަވޭ ސީރީޒެއް ފަށައިފި އެވެ.
މި ގިވްއަވޭ ސީރީޒް ހާއްސަކޮށްފައި ވަނީ އޮންލައިންކޮށް އިންޝިއުރެންސް ޕޮލިސީ ގަންނަ ކަސްޓަމަރުންނަށެވެ.
އެގޮތުން އޮންލައިންކޮށް އެލައިޑްގެ ކޮންމެ އިންޝިއުރެންސް ސްކީމެއް ގަތް ކަމުގައިވިޔަސް ހާއްސަ ހަދިޔާއެއް އެ ކަސްޓަމަރަކަށް ލިބިގެންދާނެ އެވެ. ޕޮލިސީ ގަންނަތާ 30 ދުވަހުގެ ތެރޭ އެލައިޑް އޮފީހަށް ދިއުމުން އެ ހަދިޔާ ލިބޭނެ އެވެ.
މި ގިވްއަވޭ ސީރީޒްގައި ހިމެނޭ ހަދިޔާތަކުގެ ތެރޭގައި ކޯޓު، ކުޑަ، ތޮފި، ރީޔޫޒަބަލް ކޮތަޅު، ނޯޓްބުކް، އަދި ފޯން ސްޓޭންޑު ފަދަ ހަދިޔާތައް ހިމެނެ އެވެ.
ގިވްއަވޭ ސީރީޒްގެ މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި އެލައިޑްގެ މާކެޓިން މެނޭޖަރު އައިޝަތު ސުދާ ވިދާޅުވީ އޮންލައިންކޮށް ހިދުމަތް ހޯދާ ކަސްޓަމަރުންނަށް ފޯނުމެދުވެރިކޮށް އެސްއެމްއެސްގެ ޒަރީއާއިން ރިފެރަލް ކޯޑެއް ލިބޭނެ ކަމަށެވެ. އަދި އެލައިޑްގެ ފްރަންޓް އޮފީހަށް ގޮސް އެ ކޯޑް ދައްކާލުމުން ހަދިޔާ ލިބޭނެ ކަމަށް ވިދާޅުވި އެވެ.
މި ގިވްއަވޭ ސީރީޒްގެ އިތުރުން އެ ކުންފުންޏަށް 39 އަހަރު ފުރުން ފާހަގަކުރުމަށް މިއަދުން ފެށިގެން، އެ ކުންފުނިން ޕޮލިސީ ގަންނަ ފުރަތަމަ 39 ކަސްޓަމަރުންނަށް ވެސް ހާއްސަ ހަދިޔާއެއް ދިނުމަށް ވަނީ ހަމަޖެހިފަ އެވެ.
މީގެ އިތުރުން އެހެން އަހަރުތަކެކޭ އެއްފަދައިން މި އަހަރު ވެސް ކަޕްކޭކު ބެހުމުގެ ހަރަކާތެއް ވެސް ކުރިއަށްގެންދިއުމަށް ވަނީ ހަމަޖެހިފަ އެވެ.