- އެއްވެސް ޕާޓީއަކުން ބައިވެރިނުވާނެކަމަކަށް އަންގާފައެއް ނުވޭ
- ހުރިހާ ޕާޓީއެއް މަޝްވަރާ ކުރާނީ އެއް މަޖިލީހެއްގައި
- މައްސަލަތައް ހުށަހަޅަން ފުރުސަތު ލިބޭނެ
ސަރުކާރުން އިސްނަގައިގެން ކުރިއަށް ގެންދަން ނިންމާފައިވާ ސިޔާސީ ޕާޓީތަކުގެ މަޝްވަރާތައް މާދަމާރޭ 8:30 ގައި ރައީސް އޮފީހުގައި ބާއްވަން ނިންމައިފި އެވެ.
ސްޕޯކްސްޕާސަން އިބްރާހިމް މުއާޒު އަލީ ވިދާޅުވި ގޮތުގައި، މާދަމާ ރޭ ރައީސް އޮފީހުގައި ފަށާ މަޝްވަރާތަކުގައި ހަ ސިޔާސީ ޕާޓީ އިން ކުރެ ކޮންމެ ޕާޓީއަކުން ދެ މަންދޫބުން ބައިވެރިވާނެ އެވެ. އަދި އެ ބައްދަލުވުން ކުރިއަށް ދާނީ ހުރިހާ ޕާޓީތަކެއްގެ މަންދޫބުން އެއް މަޖިލީހެއްގައި ތިބެގެން މަޝްވަރާ ކުރެވޭ ގޮތަށް ކަމަށް މުއާޒު ވިދާޅުވި އެވެ. އޭނާ ވިދާޅުވާ ގޮތުގައި އެ ބައްދަލުވުމަށް ނާންނާނެ ކަން އެއްވެސް ސިޔާސީ ޕާޓީއަކުން އަންގާފައެއް ނުވެ އެވެ.
މިހާތަނަށް އެ މަޝްވަރާތަކުގައި ބައިވެރިވާން އެއްބަސްވެފައިވާކަން އިއުލާންކޮށްފައި ވަނީ، ޖުމްހޫރީ ޕާޓީ އާއި ޑީއާރުޕީ އެވެ. އެމްޑީޕީ އަދި އަދާލަތު ޕާޓީ އިން ބުނަނީ ޖަލުގައި ތިބި ސިޔާސީ މީހުން ދޫނުކުރަނިސް މަޝްވަރާއެއް ނުކުރާނެ ކަމަށެވެ. އެހެން ނަމަވެސް ސަރުކާރުން ބުނަނީ މަޝްވަރާގެ ކުރިން ކުރާ ޝަރުތުތަކަށް ސަރުކާރުން ބޯ ނުލަބާނެ ކަމަށެވެ.
ސަރުކާރުގެ ފަރާތުން މަޝްވަރާތަކުގައި ބައިވެރިވަނީ، ޔޫތް މިނިސްޓަރު އަހުމަދު ޒުހޫރާއި ފިޝަރީޒް މިނިސްޓަރު މުހައްމަދު ޝައިނީ އަދި ޑިފެންސް މިނިސްޓަރު އާދަމް ޝަރީފެވެ.