އިލެކްޝަންސް ކޮމިޝަން (އީސީ)ގައި 21 އަހަރު މަސައްކަތް ކުރެއްވުމަށްފަހު ކޮމިޝަންގެ ނައިބް ރައީސްގެ ގޮތުގައި ހުންނެވި އިސްމާއީލް ހަބީބް އީސީ އިން ވަކިވެވަޑައިގެންފި އެވެ.
އިލެކްޝަންސް ކޮމިޝަންގެ މެންބަރު ކަމަށް ވަޑައިގަތުމުގެ ކުރިންވެސް ހަބީބް ހުންނެވީ ކޮމިޝަންގެ މުވައްޒަފެއްގެ ގޮތުގައެވެ.
އީސީގެ މެންބަރު ކަމުން ހަބީބް އިއްޔެ ވަކިވެވަޑައިގަތީ އެ ކޮމިޝަންގެ މެންބަރުކަން ފަސް އަހަރުގެ ދެ ދައުރު ކުރެއްވުމަށްފަހު އެވެ.
އީސީގެ ގާނޫނު ބުނާ ގޮތުން ކޮމިޝަންގެ މެންބަރުކަން ކުރެވޭނީ ދެ ދައުރު އެވެ.
ހަބީބް އެކްސްގައި ކުރެއްވި ޕޯސްޓެއްގައި ވިދާޅުވީ އީސީގައި މަސައްކަތް ކުރެއްވުމަށް ލިބިވަޑައިގެންނެވި ފުރުސަތަކީ އަބަދުވެސް ހަނދާނުގައި ހުންނާނެ ތަޖުރިބާތަކެއް ކަމަށެވެ. އަދި މަސައްކަތުގައި މާހައުލުގައި ހޭދަކުރެއްވި މުއްދަތުގައި އެހީތެރިކަމާއި އެއްބާރުލުން ދެއްވި ހުރިހާ ފަރާތްތަކަކަށް ހަބީބް ވަނީ ޝުކުރު އަދާކުރައްވާފަ އެވެ.
އީސީގެ މެންބަރު ކަމުން ހަބީބް ވަކިވެވަޑައިގަތުމާ ގުޅިގެން އީސީގެ މެންބަރު ކަމަށް އެ ކޮމިޝަންގެ ސެކްރެޓަރީ ޖެނަރަލް ހަސަން ޒަކަރިއްޔާ އައްޔަންކުރެއްވުމަށް މަޖިލީހުގެ ރުހުން ހޯދުމަށް ވަނީ ހުށަހަޅުއްވާފަ އެވެ.