މަސްތުވާތަކެތީގެ ގޮތުގައި މިއަަހަރުގެ މިހާތަނަށް 19 ކިލޯގެ މަސްތުވާތަކެތި އަތުލައިގެންފި އެވެ.
ފުލުހުންގެ ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ނާފިޒު ވިދާޅުވީ 19 ކިލޯގެ މަސްތުވާތަކެތި އަތުލައިގަތީ 56 އޮޕަރޭޝަނެއްގެ ތެރެއިންނެވެ.
ނާފިޒު ވިދާޅުވި ގޮތުގައި އަތުލައިގެންފައިވާ މަސްތުވާތަކެތީގެ މަގުމަތީގެ އަގު 104 މިލިއަން ދިވެހި ރުފިޔާއަށް އަރާނެ އެވެ.
ނާފިޒު ވަނީ މިއަހަރުގެ މިހާތަނަށް ކުރިއަށް ގެންދިޔަ އޮޕަރޭޝަންގެ ބައެއް ތަފާސްހިސާބުތައްވެސް ހިއްސާކުރައްވާފަ އެވެ. އެގޮތުން މަސްތުވާތަކެތީގެ އޮޕަރޭޝަންތަކުގައި މިއަހަރު 260 ދިވެހިންނާއި 16 ބިދޭސީން ހައްޔަރުކޮށް، ފަސް ޑްރަގު ކާޓެލް ހައްޔަރުކޮށްފައިވާ ކަމަށެވެ. އަދި މި އޮޕަރޭޝަންތަކުގައި 13 އުޅަނދެއް ބަލައި ފާސްކޮށްފައިވާ ކަމަށްވެސް ވިދާޅުވި އެވެ.
މަސްތުވާތަކެތީގެ މައްސަލަތަކުގައި މިއަހަރުގެ މިހާތަނަށް 257 މައްސަލައެއް ތަހުގީގުކޮށް 95 މައްސަލައެއް ޕީޖީއަށް ހުށަހަޅާފައިވާ ކަމަށްވެސް ނާފިޒު މައުލޫމާތު ދީފައިވެ އެވެ.
ނޫސްވެރިންގެ މިބައްދަލުވުމުގައި ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވީ ކަމާ ގުޅޭ އިދާރާތައް ގުޅިގެން މަސްތުވާތަކެތީގެ މައްސަލަތައް ހައްލުކުރުމަށް ކުރަމުންދާ މަސައްކަތްތަކުގައި ނަތީޖާ ފެނިގެންދާ ކަމަށެވެ.