ފަލަސްތީނަށް ދައުލަތެއްގެ ޝަރަފު ދިނުމަށް ޔޫރަޕްގެ ތިން ގައުމަކުން އިއްތިހާދުވެއްޖެ އެވެ. އިއްތިހާދުވި ތިން ގައުމަކީ ނޯވޭ، އަޔަލަންޑް އަދި ސްޕެއިން އެވެ.
މި ތިން ގައުމުން ފަލަސްތީން ދައުލަތެއްގެ ގޮތުގައި ރަސްމީކޮށް ބަލައިގަތުމަށް ހަމަޖައްސާފައިވަނީ މެއި 28، 2024 ގައެވެ.
ފަލަސްތީނަށް ދިމާވެފައި އޮތް ދަތި އުނދަގޫ ހާލަތުގައި، ސިޔާސީ ގޮތުން ނަމަވެސް ހައްލެއް ހޯއްދަވައިދެވެން އޮތީ -- ނޯވޭގެ ބޮޑުވަޒީރު ޔޯނަސް ގާރު ސްތޯރޭ ވިދާޅުވި ގޮތުގައި -- ފަލަސްތީން ދައުލަތަކަށް ހަދައިގެންނެވެ.
ބޭރުގެ އަސްކަރީ ނުފޫޒަކުން އެތައް ހާސް ބަޔަކު މަރަމުންދާއިރު މިއީ އާންމު ފަރުދުންނަށް ލިބޭ ކޮންމެވެސް ވަރެއްގެ ތަސައްލީ އަކަށް ވާނެ ކަމަށްވެސް ބޮޑުވަޒީރު ވިދާޅުވި އެވެ.
އޭނާ ވިދާޅުވީ މެދުއިރުމައްޗަށް އޮތް ހަމައެކަނި ހައްލަކީވެސް ފަލަސްތީނަށް މިނިވަން ދައުލަތެއް ލިބުން ކަމަށެވެ. ބަޔަކު ކިތަންމެ ނުރުހުނަސް ދެ ދައުލަތަށް ވުރެ ރަނގަޅު ހައްލެއް ފަލަސްތީން މައްސަލައަށް ނެތް ކަމަަށްވެސް ވިދާޅުވި އެވެ.
ބޮޑުވަޒީރު ވިދާޅުވީ ޔޫރަޕްގެ ގައުމުތަކުން ފަލަސްތީނާ މެދު ހެޔޮވަރު މިނަކުން މިނުމަކީ އެހެން ގައުމުތަކަށްވެސް ނަމޫނާއަކަށް ވާނެ ކަމެއް ކަމަށެވެ. އެއް ގައުމުން އަނެއް ގައުމު ރޫހުއާލާކޮށް ފަލަސްތީނަށް ދައުލަތެއް ހޯދައިދިނުމަށް ތެދުވަން ޖެހިއްޖެ ކަމަށްވެސް ވިދާޅުވި އެވެ.
އަޔަލަންޑްގެ ބޮޑުވަޒީރު ސައިމަން ހެރިސް ވިދާޅުވި ގޮތުގައި ފަލަސްތީން އަކީ ފުރިހަމަ ދައުލަތެއްގެ ގޮތުގައި އަޔަލަންޑުން މުއާމަލާތް ކުރާނެ އެވެ. އޭނާ އަދި ވިދާޅުވީ މިއީ ފަލަސްތީނަށާއި އަޔަލަންޑަށް ވެސް ތާރީހީ ނިންމުމެއް ކަމަށެވެ.
ސައިމަން ހެރިސް ވިދާޅުވި ގޮތުގައި އިތުރު ގައުމުތަކުން ފަލަސްތީނަށް މި ޝަރަފު ދޭނެ ކަމަަށް އުއްމީދު ކުރައްވާ ކަމަށެވެ.
ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވެސް ފަލަސްތީން ބަލައިގަންނާނެ ކަމަށް ވިދާޅުވި އެވެ. އިޒުރޭލަށް މެސެޖެއް ދެއްވުމަކީ އުއްމީދެއް ކަމުގައިވެސް ވިދާޅުވި އެވެ.
ޣައްޒާއަށް ނުހަނު ބޮޑަށް އެހީތެރިކަން ބޭނުންވެފައި އޮތްއިރު ބެންޖަމިން ނަތަންޔާހޫގެ ކަމަކީ އާމުންގެ ބޮަލަށް ބޮންއެޅުން ކަމަށްވެސް އޭނާ ވިދާޅުވި އެވެ.