ޕަބްލިކް ސާވިސް މީޑިއާ (ޕީއެސްއެމް)ގެ ފައިނޭންސް ހެޑް އަހްމަދު ހަނީފް ވަަޒީފާއިން ވަކިކޮށްފި އެވެ.
ހަނީފް ވަޒީފާ އިން ވަކިކޮށްފައި މިވަނީ އޭނާގެ މައްސަލައެއް އެ ކުންފުނިން ބަލަމުންދާތީ ދުވަސްކޮޅަކު ސަސްޕެންޑްކޮށްފައި ބެހެއްޓުމަށްފަހު އެވެ.
އަވަސްއަށް އެނގިފައިވާ ގޮތުގައި ހަނީފް ވަޒީފާ އިން ވަކިކުރިއިރު އޭނާ ހުންނެވީ ޗުއްޓީއެއްގައެވެ.
ހަނީފް ވަޒީފާ އިން ވަކިކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޕީއެސްއެމް ހިންގަވަން ތިއްބެވި ބޭފުޅުން އެކި ކުންފުނިތަކާ ހަވާލުކޮށްގެން ޕީއެސްއެމްގެ ބޭނުމަށް ކޮށްފައިވާ މަސައްކަތްތަކަކަށް ދޭންޖެހޭ ފައިސާ ދޫނުކޮށްގެން ކަމަށްވެ އެވެ. ފައިސާ ދޫކުރުމަށް ހަނީފް ދެކޮޅު ހެއްދެވީ އެ މަސައްކަތްތަކަށް ފައިސާ ދޫކުރުމުގެ ކުރިން ހަމަވާންޖެހޭ ބައެއް ލިޔެކިޔުންތައް ނެތުމާއި، އަދި އޭގެ ބައެއް މައްސަލަތައް ކޯޓުތަކުގައިވެސް ހިނގަމުންދާތީ ކަމަށް މައުލޫމާތު ލިބިފައިވެ އެވެ.
އެކައުންޓިންނާއި ފައިނޭންސްގެ ދާއިރާ އިން ޑިގްރީ ހާސިލްކުރައްވާފައިވާ ހަނީފަކީ 2006 ވަނަ އަހަރުން ފެށިގެން ޕީއެސްއެމްގައި މަސައްކަތް ކުރަމުންދިޔަ މުވައްޒަފެކެވެ.
ޕީއެސްއެމް އިން މިއަދު މެންދުރުފަހު ބާއްވާ ނޫސްވެރިންގެ ބައްދަލުވުމެއްގައި ހަނީފް ވަކިކުރުމުގެ މައްސަލައާ ގުޅޭ އިތުރު މައުލޫމާތު ހިއްސާކުރާނެ ކަމަށް ބެލެވެ އެވެ.