އަކްޝޭ ކުމާރް 2022 ގައި ކުޅެން ފެށި ފިލްމު "ވޭދަތް މަރާޑޭ ވީރް ޑައުޑަލް ސާތް" ޕްރިމިއާ ކުރުން ފަސްކޮށްފި އެވެ.
މި ފިލްމުގައި އަކްޝޭ އަދާކުރި ރޯލަކީ އިންޑިއާގައި އެއް ދުވަސްވަރެއްގައި ރަސްކަން ކުރެއްވި ޗަޓްރަޕާޓީ ޝަވާޖީ މާހްރާޖްގެ ރޯލެވެ.
މި ފިލްމުގައި ހިމެނޭ މަންޒަރުތަކުގެ ތެރެއިން އަކްޝޭ ކުޅެފައިވާ ރޯލުގެ ކުރު ވީޑިއޯ އެއްވެސް ކުރިން އާންމުކޮށްފައިވެ އެވެ. އަދި އެ ވީޑިއޯއަށް ގިނަ ބައެއްގެ ސަމާލުކަންވެސް ލިބުނެވެ.
ފިލްމުގެ ޝޫޓިން ފެށުމުގެ ކުރިން 2022 ވަނަ އަހަރުގެ ނޮވެމްބަރުގައި ބޭއްވި ލޯންޗިން އިވެންޓުގައި ފިލްމު ޕްރޮޑިއުސަރުން ކުރިން ބުނި ގޮތުގައި މިދިޔަ އަހަރު މި ފިލްމު ޕްރިމިއާ ކުރާނެ އެވެ. ނަމަވެސް މިދިޔަ އަހަރުގެ ސެޕްޓެމްބަރު މަހުވެސް މި ފިލްމު ލަސްވާނެ ކަމަށް އިއުލާންކުރި އެވެ. އޭރުވެސް އަދި މިހާރުވެސް މި ފިލްމު ލަސްވެގެން އުޅެނީ ބަޖެޓްގެ މައްސަލަތަކަކާ ހެދި ކަމަށް ބޮލީވުޑްގެ ހަބަރުތައް ގެނެސްދޭ ހަންގަމާއަށް މައުލުމާތު ދިން ފަރާތަކުން ބުނެފައިވެ އެވެ.
ބޮލީވުޑް ހަންގަމާއަށް މައުލޫމާތު ދެމުން ފިލްމުގެ ޕްރޮޑިއުސަރު ވަސީމް ގުރޭޝީ ވަނީ ބަޖެޓްގެ މައްސަލަތަކެއް ދިމާވުމުގެ ސަބަބުން ފިލްމުގެ ޝޫޓިން މިވަގުތަށް މެދުކަނޑާލާފައިވާ ކަމަށްވެސް ބުނެފަ އެވެ.
އޭނާ ބުނީ މި ފިލްމު ޝޫޓިންގެ 50 ޕަސަންޓް މަސައްކަތް އޮތީ ގާތްގަނޑަކަށް ނިމިފައި ކަމަށާއި އަކްޝޭ ކުމާރު ކުޅެން ހަމަޖެހިފައި އޮތް ގެސްޓް ރޯލުގެ ސީންތައް ޝޫޓް ކުރުމަށް ތިން ދުވަސް ވެސް ކުރިން ހޭދަކުރި ކަމަށެވެ. މީގެ އިތުރުން އަކްޝޭ އަށް ލިބެންޖެހޭ ފީގެ ބޮޑު ބައެއް ދީފައި އޮތް ކަމަށްވެސް މައުލޫމާތު ލިބެ އެވެ.
ބަޖެޓުގެ މައްސަލަތަކާ ހެދި މިހާރު ޖެހިފައިވާ މައްސަލަތައް ހައްލުވާނެ ވަކި ދުވަހެއް އެނގިފައި ނުވާ ކަމަށާއި އަދި ޝޫޓިން ނިމޭނެ ދުވަހެއްވެސް ނޭނގޭ ކަމަށްވެސް ގުރޭޝީ ބުނެފައިވެ އެވެ.