ފުލުހުންގެ އިސް ދެ ބޭފުޅަކަށް މަގާމުގެ ކުރިއެރުން ދިނުމުގެ ގޮތުން އެސިސްޓެންޓް ކޮމިޝަނާ އޮފް ޕޮލިސް (އޭސީޕީ)ގެ މަގާމަށް އައްޔަންކުރައްވައިފި އެވެ.
މި މަގާމަށް އައްޔަންކުރެއްވި ދެ ބޭފުޅުންނަކީ ފުލުހުންގެ ތަރުޖަމާނުގެ ގޮތުގައި ހުންނެވި ޗީފް ސުޕްރިބްޓެންޑެންޓް އޮފް ޕޮލިސް އަހްމަދު ޝިފާން އާއި ސެންޓްރަލް ޕޮލިސިން ކޮމާންޑުގެ ހެޑް ޗީފް ސުޕްރިޓެންޑެންޓް އޮފް ޕޮލިސްގެ ގޮތުގައި ހުންނެވި އަބްދުﷲ ޝަރީފް އެވެ.
މި ދެ ބޭފުޅުންނަށް މަގާމުގެ ކުރިއެރުން ދިން ކަމުގެ ލިޔުން ހަވާލުކޮށްދެއްވީ އިސްކަންދަރު ކޮށީގައި އޮތް ރަސްމިއްޔާތެއްގައި ހޯމްލޭންޑް ސެކިއުރިޓީ މިނިސްޓަރު އަލީ އިހްސާނެވެ.
ފުލުހުންގެ ގާނޫނުގައިވާ ގޮތުން އެ މުއައްސަސާގައި އިދާރީ ގޮތުން މަގާމުގެ ކުރިއެރުން ދެވޭނެ އެންމެ އިސް މަގާމަކީ އެސިސްޓެންޓް ކޮމިޝަނާ އޮފް ޕޮލިސްގެ މަގާމެވެ. އޭސީޕީގެ މަގާމުގެ މައްޗަށް ދެން ހިމެނެނީ ޑެޕިއުޓީ ކޮމިޝަނާ އޮފް ޕޮލިސްގެ މަގާމާއި ކޮމިޝަނާ އޮފް ޕޮލިސްގެ މަގާމެވެ. މި ދެ މަގާމަކީ ރައީސުލްޖުމްހޫރިއްޔާއަށް ފެނިވަޑައިގަންނަވާ ބޭފުޅުން އައްޔަންކުރައްވާ ދެ މަގާމެވެ.