ފުލުހުންގެ ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބް ވިނަރެސް ފްލެޓެއް ގަނެފައިވާ ކަމަށް ބުނެ ސޯޝަލްމީޑިއާގައި ދައުރުކުރަމުންދާ މައުލޫމާތާ ގުޅިގެން އެއްވެސް ކަމެއް ގޯސްކޮށް ހިނގާފައިވޭތޯ ބަލަމުންދާ ކަމަށް ފުލުހުން ބުނެފި އެވެ.
ފުލުހުންގެ ތަރުޖަމާނު އަދި އެސިސްޓަން ކޮމިޝަނާ އޮފް ޕޮލިސް އަހްމަދު ޝިފާން މިއަދު ވިދާޅުވީ ރަޖުނީއާ ގުޅޭ ގޮތުން ވާހަކަތަކެއް ދައުރުވަމުންދާތީ ފުލުހުން އެކަން ބަލަމުންދާ ކަމަށެވެ.
"ސުޕްރިންޓެންޑެންޑް އޮފް ޕޮލިސް ރަޖުނީ ޝުއައިބާ ގުޅޭ ގޮތުން ސޯޝަލް މީޑިއާގައި އާންމުކުރަމުންދާ މައުލޫމާތާ ގުޅިގެން ދިވެހި ފުލުހުންގެ ހިދުމަތުން ބަލަންޖެހޭ ކަންކަން ބަލަމުންދާ ވާހަކަ ދަަންނަވަމެވެ،" ޝިފާން ވިދާޅުވި އެވެ.
ވިނަރެސް ޓަވަރުތަކުގައި ހުރި ފްލެޓްތަކުގެ ތެރެއިން ފްލެޓެއް ރަޖުނީ ގަނެފައިވާ ކަމަށް ސޯޝަލްމީޑިއާގައި ތިލަކުރީ "ހަސަންކުރުސީ"ގެ ނަމުގައި ހިންގާ އެކްސް އެކައުންޓް ގައެވެ.
އަވަސްއަށް އެނގިފައިވާ ގޮތުގައި ރަޖުނީ ވަނީ ހުޅުމާލޭގައި ހުންނަ ޕޮލްކޯ ފްލެޓްތަކުގެ ތެރެއިން ވެސް ފްލެޓެއް ހޯދާފަ އެވެ.
ރަޖުނީ ތިން މިލިއަނެއްހާ ރުފިޔާއަށް ފްލެޓް ގަނެފައިވާތީ އެއީ އޭނާ ކިހިނެއް ހޯދި ފައިސާއެއްތޯ އާންމުން ގެންދަނީ ސުވާލު އުފައްދަމުންނެވެ.
އަވަސްއަށް އެކި ފަރާތްތަކުން ހިއްސާކޮށްފައިވާ މައުލޫމާތުތަކަށް ބަލާއިރު ވިނަރެސް ޓަވަރުގައި އެހެން ބައެއް ފުލުހުންވެސް ފްލެޓް ގަނެގެން ދިރިއުޅެ އެވެ.