ދައުލަތުގެ ވެހިކަލްތަކެއް ވަގަށް ނަގަމުންދިޔަ ގްރޫޕެއް ހައްޔަރުކޮށް މައުލޫމާތު ބެލިއިރު އެ މީހުންގެ ނަމުގައި 100 ވެހިކަލް ރަޖިސްޓްރީކޮށްފައިވާ ކަމަށް ފުލުހުން މިއަދު ހާމަކޮށްފި އެވެ.
ފުލުހުން މިކަން ހާމަކޮށްފައިވަނީ މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގަ އެވެ.
އެމްއޭސީއެލްގެ ހައި ސެކިއުރިޓީ ޒޯނަކުން އެ ކުންފުނީގެ އެމްޑީގެ ވޭން ވަގަށް ނެގި މައްސަލައިގެ ތަހުގީގުގެ ތަފުސީލު ހާމަކުރައްވަމުން މާލެ އޭރިއާ ދެއެއްގެ ކޮމާންޑަރު ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ދާއޫދު ވިދާޅުވީ އެ މައްސަލައިގައި ބަޔަކު ހައްޔަރުކޮށް ބެލިބެލުމުން އެ މީހުންގެ ނަމުގައި 100 ވެހިކަލް ރަޖިސްޓްރީކޮށްފައިވާކަން ފާހަގަކުރެވިފައިވާ ކަމަށެވެ.
ދާއޫދު ވިދާޅުވި ގޮތުގައި އެމްއޭސީއެލްގެ އެމްޑީގެ ވޭން ވަގަށް ނަގައިގެން ނެރެފައިވަނީ އެމްއޭސީއެލްގެ ހުޅަނގުން ބްރިޖަށް ނިކުމެވެން އޮންނަ މަގުންނެވެ. އެއަށްފަހު ވޭން ހުޅުމާލެއަށް ގެންގޮސް، ހުޅުމާލެ އޮރެންޖް ބިލްޑިން ކައިރީގައި މަޑުކުރުމަށްފަހު ވޭންގެ ވެހިކަލްގެ ނަންބަރު ޕްލޭޓް ބަދަލުކޮށްފައިވާކަން ފާހަގަކުރެވިފައިވާ ކަމަށް ދާއޫދު ވިދާޅުވި އެވެ.
އެއަށްފަހު ވޭން މާލެ ގެނެސް މާލޭގެ ގަރާޖަކަށް ވައްދަނިކޮށް ފެނިފައިވާ ކަމަށް ދާއޫދު ވިދާޅުވި އެވެ. އޭނާ ވިދާޅުވި ގޮތުގައި އެ ގެއަކީ ވަރަށްފަހުން އަލިފާނުގެ ހާދިސާއެއް ހިނގި ގެއެކެވެ.
"އަޅުގަނޑުމެންގެ ތަހުގީގު ޓީމް މިދެންނެވި ގަރާޖަށް ގޮސް ގަރާޖު ކުއްޔަށް ނަގައިގެން އުޅޭ ފަރާތް އެތަނަށް އެވަގުތު ހާޒިރުކުރެވި އޭނަގެ ހާޒިރުގައި ގަރާޖު ބަލައިފާސްކުރިއިރުގައި އެމްއޭސީއެލް އިން ވަގަށް ނެގި ވޭން ގަރާޖު ތެރޭގައި ޕާކްކޮށްފައި އޮއްވާ އަޅުގަނޑުމެންނަށް ވަނީ ފެނިފައިވޭ،" ދާއޫދު ވިދާޅުވި އެވެ.
ދާއޫދު ވިދާޅުވި ގޮތުގައި މި އަހަރު ހުޅުމާލެއިން ވަގަށް ނެގި އިމިގްރޭޝަންގެ ކާރެއްވެސް އެ ގަރާޖުން ފެނިފައިވެ އެވެ.
މި މައްސަލައިގައި ބެލިބެލުމުން ވަގަށް ނަގާ ހަތަރު ފުރޮޅުލީ ވެހިކަލްތަކުގެ އަސްލު އޮޅުވާލުމަށް މަސައްކަތްކޮށްފައިވާކަން ފާހަގަކުރެވިފައިވާ ކަމަށް ދާއޫދު ވިދާޅުވި އެވެ.
"އިންޖީނު ނަމްބަރާއި ޗެސިސް ނަންބަރު ކަހާލުމަށްފަހު ފުޅާ ދާއިރާއެއްގައި މާލޭގައި މި ވިޔަފާރި މި ދެންނެވި ފަރާތުން ކުރަމުންދާކަން،" ފާހަގަކުރެވިފައިވާ ކަމަށް އޭނާ ވިދާޅުވި އެވެ.
މިކަމާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ ކ. މާލެ، މ. މޮޑަންކޮމެންޓް، އަހުމަދު ނިޒާމް (43އ) އާއި އެމްއޭސީއެލްގެ ވެހިކަލް ވަގަށް ނެގުމުގައި ބައިވެރި ކަމަށް ތުހުމަތު ކުރެވޭ އެމްއޭސީއެލްްގެ މުވައްޒަފެއް ކަމަށްވާ މ. ސީނިއަސުރުމާގެ މުހައްމަދު ހައިޝަމް (42އ) އެވެ.
އެ ގަރާޖު ހިންގާ މީހާގެ ނަމުގައި 100 ވެހިކަލް ރަޖިސްޓްރީކޮށްފައިވާކަން ތަހުގީގަށް ފާހަގަކުރެވިފައިވާ ކަމަށާއި އޭގެ ތެރޭގައި ހަތަރު ފުރޮޅުލީ 86 ވެހިކަލް ހިމެނޭ ކަމަށް ދާއޫދު ވިދާޅުވި އެވެ.
"މި ދެންނެވި 86 ވެހިކަލް ބަހާލާފައިވަނީ އަހުމަދު ނިޒާމްގެ އަނބިކަނބަލުންގެ ނަމުގައި 42 ވެހިކަލެއް ބާކީ ހުރި ވެހިކަލް އަހުމަދު ނިޒާމްގެ ނަމުގައި،" ދާއޫދު ވިދާޅުވި އެވެ.
ދާއޫދު ވިދާޅުވީ ޓްރާންސްޕޯޓް މިނިސްޓްރީ މެދުވެރިކޮށް ބެލިބެލުމުން އަހަރު އޮޅުވާލައިގެން ވެހިކަލް ރަޖިސްޓްރީކޮށްފައިވާކަން ފާހަގަކުރެވިފައިވާ ކަމަށެވެ.
"ރަޖިސްޓްރީ ޓްރާންސްޕޯޓް މެދުވެރިކޮށް 2025، 2026، 2027 މިއީ އަދި އަޅުގަނޑުމެންނާ ބައްދަލުނުކުރާ އަހަރުތައް. ބައްދަލުނުކުރާ އަހަރުތަކުގެ ނަމުގައި ވެހިކަލް ރަޖިސްޓްރީކޮށް، ވެހިކަލްގެ ރަޖިސްޓްރީ އިޝޫކޮށްފައި ހުރިކަން ފާހަގަކުރެވިފައިވޭ،" ދާއޫދު ވިދާޅުވި އެވެ.
އަހުމަދު ނިޒާމުގެ މައްސަލަ ތަހުގީގުކޮށް މިއަދު ޕީޖީއަށް ފޮނުވާފައިވާ ކަމަށާއި ޓްރާންސްޕޯޓް މިނިސްޓްރީގައި މިކަމުގައި ޝާމިލުވާ މީހުން ހޯދުމުގެ ތަހުގީގުވެސް ކުރިއަށްދާ ކަމަށް ދާއޫދު ވިދާޅުވި އެވެ.
ނިޒާމްއަކީ ރާއްޖެއިން ބޭރުން ވެހިކަލް އެތެރެކުރާ މީހެއްކަން ފާހަގަކޮށް ފުލުހުން ބުނީ އޭގެ ތެރޭގައި ރަނގަޅު ގޮތުގައި އެތެރެ ކޮށްފައިވާ ވެހިކަލްވެސް ހިމެނޭނެ ކަމަށެވެ.