ޔޫރަޕުގެ އެންމެ ޝަރަފުވެރި މުބާރާތް ޔޫރަޕިއަން ޗެމްޕިއަންޝިޕް ނުވަތަ ޔޫރޯ މިރޭ ފަށާއިރު މެންޗަސްޓާ ސިޓީގެ ޒުވާން ފޯވާޑް އާލިން ހާލަންޑް މުބާރާތުގައި ނުފެންނާނެ އެވެ.
މިފަހަރުގެ ޔޫރޯގައި ކުޅުމުގެ ފުރުސަތު ލިބިފައި ނުވާ އެއް ކުޅުންތެރިޔަކީ ހާލަންޑް އެވެ. އޭނާ އަންނަނީ އިނގިރޭސި ޕްރިމިއާ ލީގާއި ޗެމްޕިއަންސް ލީގުގައިވެސް މޮޅު ކުޅުމެއް ކުޅެ މެންޗަސްޓާ ސިޓީއަށް ގިނަ ކާމިޔާބީތަކެއް ހޯދައިދެމުންނެވެ.
ނިމިދިޔަ ސީޒަނުގައި ވެސް ސިޓީއާ އެއްކޮށް އޭނާ ވަނީ އިނގިރޭސި ލީގު ކާމިޔާބުކޮށްފަ އެވެ. އަދި އެ މުބާރާތުގައި އެންމެ ގިނަ ގޯލު ޖަހާފައިވަނީ ވެސް އޭނާ އެވެ.
ޔޫރަޕުގެ ފުޓުބޯޅައިގެ އެންމެ ވިދުންގަދަ ތަރި ހާލަންޑަށް ޔޫރޯ ކުޅުުމުގެ ފުރުސަތު ނުލިބުނީ އޭނާގެ ގައުމު -- ނޯވޭ މިމުބާރާތަށް ކޮލިފައި ނުވުމުގެ ސަބަބުންނެވެ.
ޔޫރޯ ކޮލިފައިންގައި ނޯވޭ ހިމެނުނީ ސްޕޭން އަދި ސްކޯޓްލޭންޑް ހިމެނުނު ގުރޫޕް ގައެވެ. އެ ގްރޫޕުން ޔޫރޯއަށް ކޮލިފައިވީ ސްޕޭންގެ އިތުރުން ސްކޯޓްލޭންޑެވެ. ނޯވޭ އަށް އެދެވޭ ނަތީޖާއެއް ނުނެރެވި ކޮލިފައިންގައި އެގައުމު ކެޓީ އެވެ.
ނޯވޭ ގައުމީ ޓީމަށް ކުޅުނު 32 މެޗުގައި ހާލަންޑް ވަނީ 30 ގޯލު ޖަހާ ދީފަ އެވެ. އެހެންނަމަވެސް ނޯވޭ ޓީމަށް އެދެވޭ ނަތީޖާތަކެއް އަދި މިހާތަނަށް ނެރެވިފައެއް ނުވެ އެވެ.
ނޯވޭގެ މުހިއްމު ގިނަ މެޗުތަކުގައި ހާލަންޑަށްވެސް މާހުނަރުވެރި ކުޅުމެއް ދެއްކޭ ގޮތެއް ނުވެ އެވެ. ހާލަންޑުގެ އިތުރުން ނޯވޭ ޓީމުގައި އާސެނަލްގެ އޮޑެގާޑްވެސް ހިމެނެ އެވެ. އަދި ޔޫރަޕްގެ ޗްލަބުތަކަށް ކުޅޭ ކުޅުންތެރިން އެމީހުން ނޫނަސް ގައުމީ ޓީމުގައި އެބަ ތިއްބެވެ.
ނޯވޭ ގައުމީ ޓީމާ އެއްކޮށް އަދި މިހާތަނަށް ހާލަންޑް އެއްވެސް ބޮޑު މުބާރާތަކަށް ކޮލިފައިވެފައެއް ނުވެ އެވެ. ކުރިއަށް އޮތް ތަނުގައި ހާލަންޑް އާއި އެއްކޮށް ނޯވޭ ގައުމީ ޓީމު ޔޫރޯ ނުވަތަ ވޯލްޑް ކަޕް މުބާރާތަކުން ފެނުމަކީ އޭނާގެ ގިނަ ސަޕޯޓަރުން ދެކޭ ހުވަފެނެކެވެ.
އިނގިރޭސި މީޑިއާއަށް ދިން އިންޓަވިއުއެއްގައި ހާލަންޑްވެސް ވަނީ ގައުމާއި އެެއްކޮށް ކާމިޔާބީތަކެއް ހާސިލް ކުރުމަކީ އޭނާ ވަރަށް ކުރިއްސުރެ ދެކެމުން އަންނަ ހުވަފެނެއް ކަމަށް ބުނެފަ އެވެ. ޔޫރޯ ފަދަ ބޮޑު މުބާރާތެެއް ތަޖުރިބާ ކޮށްލަން ބޭނުން ކަމަށްވެސް އޭނާ ބުންޏެވެ.
ނޯވޭއާއި މެންޗަސްޓާ ސިޓީގެ ޒުވާން ފޯވާޑް އާލިން ހާލަންޑް