މާލޭގެ ދަރުބާރުގެ ކައިރީގައި މާރާމާރީ ހިންގައި ތޫނު އެއްޗަކުން ހަމަލާދިނުމުގެ ތުހުމަތުގައި ދެ މީހަކު ހައްޔަރުކޮށްފި އެވެ.
ފުލުހުން ބުނީ ދަރުބާރުގެ ކައިރީގައި މާރާމާރީއެއް ހިންގައިގެން އުޅޭ ކަމަށް ރިޕޯޓްކޮށްފައިވަނީ މިރޭ 10:30 ހާއިރު ކަމަށެވެ. މީހަކަށް ތޫނު އެއްޗަކުން ހަމަލާ ދިން ކަމަކަށް ފުލުހުން ނުބުނެ އެވެ.
އެކަމަކު މަންޒަރު ދުށް ބައެއް މީހުން ބުނާ ގޮތުގައި ދަރުބާރުގެ ކައިރީގައި ވަނީ ތޫނު އެއްޗަކުންވެސް މީހަކަށް ހަމަލާ ދީފަ އެވެ.
ފުލުހުން ބުނީ މާރާމާރީގައި އަނިޔާވި މީހާއަށް ސެނެހިޔަ ހޮސްޕިޓަލްގައި ފަރުވާ ދެމުންދާ ކަމަށާއި އޭނާގެ ހާލު ސީރިއަސް ނޫން ކަމަަށް ހޮސްޕިޓަލުން މައުލޫމާތު ދީފައިވާ ކަމަށެވެ.
މިމައްސަލަ އާއި ގުޅިގެން ދެ މީހަކު ހައްޔަރުކޮށްފައިވާ ކަމަށް ފުލުހުން ބުނި ނަމަވެސް މި މީހުންގެ އެއްވެސް މައުލޫމާތެއް ހިއްސާކޮށްފައެއް ނުވެ އެވެ.
މިމައްސަލަ ގެންދަނީ އިތުރަށް ތަހުގީގު ކުރަމުން ކަމަށްވެސް ފުލުހުން މައުލޫމާތު ދީފައިވެ އެވެ.