ޔޫރޯ ފުޓްބޯޅަ މުބާރާތުގައި މިރޭގެ ދެވަނަ މެޗުގައި ފޯރިގަދަ ކުޅުމަކަށްފަހު އިނގިރޭސިންނާއި ޑެންމާކް ކުޅުން މެޗު ނިމުނީ 1-1 އަކުން އެއްވަރުވެގެންނެވެ.
މިމެޗުގެ ނަތީޖާ އާއި އެކު އިނގިރޭސިންނަށް ގަދަ 16 އަށް ދަތުރު ކުރުމަށް ކުރަންޖެހޭ އިންތިޒާރު ވަނީ ދިގުލައިގެން ގޮސްފަ އެވެ.
މި ގްރޫޕުގައި ހިމެނޭ ހުރިހާ ޓީމަކަށްވެސް ދެވަނަ ބުރަށް ދަތުރު ކުރުމުގެ ފުރުސަތު އަދި އެބައޮތެވެ.
މިމެޗުގެ 18 ވަނަ މިނިޓްގައި އިންގްލެންޑަށް ލީޑު ނަގައިދިނީ ޓީމުގެ ކެޕްޓަން ހެރީ ކޭން އެވެ. އޭރިއާ ތެރެއިން ލިބުނު ފުރުސަތުގައި ކޭން ވަނީ ގޯލުގެ ކަނަށް ބޯޅަ ފޮނުވާލާފަ އެވެ.
މެޗުގެ 33 ވަނަ މިނިޓްގައި ޑެންމާކަށް އެއްވަރުކޮށްދިނީ މޯޓެން ހިއުލްމަންޑް އެވެ. އޭރިއާ ބޭރުން ހިއުލްމަންޑް ޖެހި ބާރު ބޯޅަ ގޯލަށް ވަނީ ދަނޑީގައި ޖެހިފަ އެވެ. މިއީ ގައުމީ ޓީމަށް އޭނާ ޖަހައިދިން ފުރަތަމަ ލަނޑެވެ.
އިނގިރޭސީންނަށް އަދި މިހާތަނަށް އެންމެ ފަހަރަކު ވެސް ޔޫރޯ މުބާރާތް ކާމިޔާބުކުރެވިފައި ނުވާއިރު އެންމެ ފަހުގެ ޔޫރޯ މުބާރާތުގެ ފައިނަލަށް ވެސް އެޓީމުން ވަނީ ދަތުރު ކޮށްފަ އެވެ.