މަސްވެރިންނަށް ފައިސާ ނުދޭތީ އައްޑޫ މޭޔަރު އަލީ ނިޒާރު ކަންބޮޑުވުން ފާޅުކުރައްވައިފި އެވެ.
އައްޑޫގެ މަސްވެރިން ގެންދަނީ އެ މީހުން މިފްކޯއަށް ކިރުވި މަހަށް ދޭން ޖެހޭ ފައިސާ ނުދީގެން މިދިޔަ ހަފްތާ އިން ފެށިގެން މުޒާހަރާކުރަމުންނެވެ.
މސްވެރިންގެ މުޒާހަރާއާ ގުޅިގެން މޭޔަރު އަލީ ނިޒާރު ވިދާޅުވީ މަސްވެރިންނަށް މިފްކޯއިން ލިބެންޖެހޭ ފައިސާ ނުލިބިގެން އަނެއްކާވެސް އައްޑޫގެ މަސްވެރިން އިހްތިޖާޖު ފަށަން ޖެހުމަކީ ކަންބޮޑުވުން އޮތް މައްސަލައެއް ކަމަށެވެ.
ނިޒާރު ވިދާޅުވީ މަސްވެރިންގެ މުޒާހަރާއާ ގުޅިގެން ކަމާ ގުޅޭ އިދާރާތަކުން އަދިވެސް އެކަށީގެންވާ ޖަވާބެއް ލިބިފައި ނުވާ ކަމަށެވެ.
"ކޮރަޕްޝަންގެ ހާއްޔެއްގެ ގޮތުގައި ސިފަކުރެވޭ މިފްކޯ ހިންގުމުގެ ވިޔާނުދާ ސިޔާސަތަށް އެއްވެސް ބަދަލެއް ނުގެނެވި އެތަކެއް ސަރުކާރުތަކެއް ބަދަލުވެ ދިއުމާއި މިސަރުކާރުންވެސް އެކަމަށް ހަރުދަނާ ފިޔަވަޅުތަކެއް އަޅާފައި ނުވާކަމީ މަސްވެރިންނަށް މާޔޫސްކަން ގެނުވާ ކަމެއް،" ނިޒާރު ވިދާޅުވި އެވެ.
މޭޔަރު އިތުރަށް ވިދާޅުވީ އުއްމީދަކި ސަރުކާރުން އައްޑޫގެ މަސްވެރިންގެ އަޑު އަހައި މިކަމަށް އަވަސް ހައްލެއް ހޯދައިދިނުން ކަމަށެވެ.
