ރައްޔިތުންގެ މަޖިލީހަށް ހުށަހަޅާފައިވާ ސޮވެރިން ޑިވެލޮޕްމަންޓް ފަންޑު (އެސްޑީއެފް)ގެ ބިލަށް އާންމުންގެ ހިޔާލު ހޯދުމަށް ހުޅުވާލައިފި އެވެ.
މި ބިލަށް ހިޔާލު ހުށަހެޅުމުގެ ސުންގަޑިއަކީ މިމަހުގެ ނުވަވަނަ ދުވަހުގެ މެންދުރުފަހު 2:00 އެވެ. އީމެއިލް ކޮށްގެންވެސް އަދި ހިޔާލުތައް މަޖިލީހުގެ އިދާރާއަށް ފޮނުވައިގެންވެސް ހިޔާލު ހުށަހެޅި ދާނެ އެވެ.
މި ބިލް މަޖިލީހަށް އެންމެ ފުރަތަމަ ހުށަހެޅީ ނިމިދިޔަ 19 ވަނަ ރައްޔިތުންގެ މަޖިލީހުގައި ރައީސް ޑރ. މުހައްމަދު މުއިއްޒުގެ ސަރުކާރުންނެވެ. ނަމަވެސް މިބިލް މަޖިލީހަށް ބަލައިގަތުމަށް ވޯޓަށް އެހުމަށް އޮތް ދުވަހު ޕީއެންސީގެ މަޖިލިސް މެންބަރުން ތަޅުމުގައި ނެތުމުން އޭރު މަޖިލީހުގެ މެޖޯރިޓީ އޮތް ޕާޓީ -- އެމްޑީޕީން ވަނީ މިބިލް ބޭރުކޮށްލާފަ އެވެ.
ފަހުން މިހާރު ހިނގަމުންދާ 20 ވަނަ މަޖިލީހަށް އެސްޑީއެފްގެ ބިލް ހުށަހެޅުއްވީ ފުވައްމުލައް މެދު ދާއިރާގެ މެމްބަރު އަލީ ފަޒާދެވެ. ފަހުން ބިލް ހުށަހެޅުއްވިއިރު އެއްވެސް ބަދަލެއް ގެނެސްފައެއް ނުވެ އެވެ.
މާލިއްޔަތު ގާނޫނުގެ ދަށުން އުފައްދާފައިވާ އެސްޑީއެފް އަކީ ދައުލަތުގެ ދަރަނި ދެއްކުން ފަސޭހަ ކުރުމަށްޓަކައި ހަދާފައިވާ ފަންޑެކެވެ. މި ފަންޑަށް ޖަމާކުރަނީ އެއާޕޯޓް ޑިވެލޮޕްމަންޓު ފީ އާއި ކްރޮސް ސަބްސިޑީގެ ގޮތުގައި މަޝްރޫއުތަކުގެ ލިބޭ ފައިސާ އެވެ.
ބިލްގައިވާ ގޮތުން މި ފަންޑު ބަލަހައްޓަން ގަވާނިން ކޮމިޓީއެއް އެކުލާވާލާނެ އެވެ. މީގެއިތުރުން މި ފަންޑުގެ ފައިސާ ބޭނުންކުރާނެ ގޮތާއި ފަންޑުގެ ފައިސާ އިންވެސްޓް ކުރާނަމަ އަމަލުކުރާނެ ގޮތްތަކެއްވެސް މިބިލްގައިވެ އެވެ.