އެލައިޑް ރޯދަ ޕްރޮމޯޝަނާއި އެކު ގިނަ ފުރުސަތުތަކެއް ހުޅުވާލައިފި އެވެ.
އެލައިޑް އިންޝުއަރަންސް ކުންފުނީގެ ރޯދަ ޕްރޮމޯޝަން އިއުލާންކުރުމަށް މިއަދު ބޭއްވި ހާއްސަ ނޫސްވެރިންގެ ބައްދަލުވުމުގައި އެލައިޑުން ވަނީ އެކުންފުނީގެ އިސްލާމިކް ވިންޑޯ އަޔާދީ ތަކާފުލްއަށް 10 އަހަރު ފުރުމުގެ މުނާއްސަބާގައި އަޔާދީގެ ހީވާގި މުވައްޒަފުންނަށާއި ލޮބުވެތި ކަސްޓަމަރުންނަށް ތަހުނިޔާ އަރިސްކޮށްފައެވެ.
މީގެ އިތުރުން، މިއަހަރަށް ހާއްސަކޮށްގެން ފަރުމާކޮށްފައިވާ ރޯދަ ޕްރޮމޯޝަނުގައި އެލައިޑުން ވަނީ ގެދޮރުގައިވާ އަގުހުރި މުދަލަށް ހާއްސަ އިސްލާމިކް އިންޝުއަރަންސް ޕްލޭން؛ ހިޔާވަހީގެ އަހަރަކަށް 600 ރުފިޔާ ދައްކައިގެން ހަ ލައްކަ ފަންސާސްހާސް ރުފިޔާއާއި ހަމައަށް ބަދަލު ލިބޭ ލަގްޒަރީ ޕްލޭން ނަންގަވާ ކޮންމެ ކަސްޓަމަރަކަށް، ބައްލަވައިގެންނެވި ޕްލޭނާއި އެއް އަގުގެ ކޮމްޕްލިމެންޓަރީ ގިފްޓް ޕެކެއް ދިނުމަށް ހަމަޖައްސާފަ އެވެ. ގެދޮރުގެ ރައްކާތެރިކަމަށް ދެއްވާ އަހައްމިއްޔަތު އިތުރުކުރުމަށްޓަކައި ފަށާފައިވާ މި ޕްރޮމޯޝަން ކުރިޔަށްގެންދިޔުމަށް ހަމަޖެހިފައިވަނީ މިއަދުން ފެށިގެން، މިއަހަރުގެ ރަމަޟާން މަހުގެ ނިޔަލަށެވެ. އަދި މިއީ އޮންލައިންކޮށް އެލައިޑް އެޕުންނާއި މައި އެލައިޑް ޕޯޓަލުން ނެންގެވޭ ޕްލޭނެއް ކަމުން، ކޮމްޕްލިމެންޓަރީ ގިފްޓް ރެޑީމް ކުރުމުގެ އިންތިޒާމް ހަމަޖައްސާފައިވަނީ ރަސްމީ ގަޑީގައި އެލައިޑްގެ ކަސްޓަމަރ ފްރަންޓް އޮފީސް؛ ހ.އޯކިޑުންނެވެ.
އެލައިޑުން މިއަދު އިތުރަށް އިއުލާންކޮށްފައިވާ ފުރުސަތުތަކުގެ ތެރޭގައި، ފޭސްބުކްގައި ކުރިޔަށްގެންދިޔުމަށް ހަމަޖެހިފައިވާ އެލައިޑް މަދަހަ މުބާރާތާއި ޓިކްޓޮކްގައި ކުރިޔަށްގެންދިޔުމަށް ރާވާފައިވާ #އިންޝުއަރލައިފްވިތްއެލައިޑް ކޮންޓެސްޓް ފާހަގަކޮށްލެވެއެވެ. އެގޮތުން މަދަހަ މުބާރާތުގައި ބައިވެރިވެލެއްވުމަށް، ރަމަޟާން މަހުގެ 1 އިން ފެށިގެން 30ވަނަ ދުވަހުގެ ނިޔަލަށް #އެލައިޑްމަދަހަ ޖެއްސެވުމަށް ފަހު ޕޯސްޓް ކުރައްވާ މަދަހަ ވީޑިއޯތަކުގެ ތެރެއިން ފަނޑިޔާރުން އެންމެ މޮޅުކަމަށް ނިންމާ ވީޑިއޯ ހުށައަޅާ ފަރާތަކަށް އިނާމަކަށް އައިޕެޑެއް ލިބިގެންދާނެއެވެ. 12 އަހަރުން ދަށުގެ ކުދިންނަށް ހުޅުވާލާފައިވާ މިފުރުސަތުގައި، ވީޑިއޯ ޕޯސްޓް ކުރައްވަންވާނީ ބެލެނިވެރިޔާގެ ހުއްދައާއި އެކު ބެލެނިވެރިޔާގެ ފޭސްބުކް އެކައުންޓްގައި ޕަބްލިކް ސެޓިންގައެވެ. އަދި މި ވީޑިއޯތަކުގެ ތެރެއިން އިނާމް ހައްގުވާ ވީޑިއޯ ކަށަވަރު ކުރުމަށް ހަމަޖެހިފައިވަނީ މި މުބާރާތައް ކަނޑައަޅާފައިވާ ޖަޖުން ދެއްވާ މާކްސްއަށް ބެލުމަށް ފަހުގައެވެ.
އެލައިޑުން މުޅިން އަލަށް ފަށާ #އިންޝުއަރލައިފްވިތްއެލައިޑް ޓިކްޓޮކް ކޮންޓެސްޓަކީ ޓިކްޓޮކް އުފައްދާ ފަރާތްތަކުން ހޭޝްޓެގާއި މެދު ދެކޭގޮތް ނުވަތަ އިންޝުއަރަންސް ސިފަވާ ގޮތް މާނަކޮށް، ތަޖުރިބާގެ އަލީގައި ނުވަތަ ކްރިއޭޓިވް ހިޔާލެއްގެ މައްޗައް ބިނާކޮށް ހަދާ ވީޑިއޯ ޕޯސްޓް ކުރުމުން، ނަސީބުވެރި ތިން ފަރާތަކަށް 3000 ރުފިޔާގެ ފައިސާގެ އިނާމް ލިބޭ ގޮތަށް ފަރުމާކޮށްފައިވާ ކޮންޓެސްޓެކެވެ. މި ކޮންޓެސްގައި ބައިވެރިވެ ޓިކްޓޮކް ޕޯސްޓް ކުރުމަށް ހުޅުވާލާފައިވާ މުއްދަތަކީ މިއަދުން ފެށިގެން، 25 މާޗްގެ ނިޔަލަށެވެ.
އެލައިޑުގެ މަދުސަދަކީ މިއަހަރުގެ ރަމަޟާން މަހުވެސް އިންޝުއަރަންސާއި ބެހޭ އަގުހުރި މައުލޫމާތު ޝައުގުވެރި ގޮތްތަކަށް އާންމުންނާއި ހަމައަށް ފޯރުކޮށްދީ، އިންޝުއަރަންސްގެ ރައްކާތެރިކަން ހޯއްދެވުމަށް ހިތްވަރު ދިނުމެވެ. އަދި މީގެ އިތުރުން، ކުންފުންޏެއްގެ ހައިސިއްޔަތުން ކަސްޓަމަރުންނާއި އޮންނަ ގުޅުން އިތުރަށް ހަރުދަނާ ކުރުމަކީ ވެސް އެލައިޑުން ހުޅުވާލި މިފުރުސަތުތަކުގެ ފަހުތަގައިވާ ލަނޑުދަނޑިއެކެވެ.