އިންޑިއާ އަދި އޭޝިއާގައިވެސް ހުރި އެންމެ ބޮޑު މަހުޖަނު މުކޭޝް އަމްބާނީގެ ހަގު ދަރިފުޅު އާނަންތު އަމްބާނީ އާއި ރާދިކާ މާޗަންޓުގެ ކައިވެނީގެ ހަފްލާގައި ރާއްޖޭގެ ކުރީގެ ރައީސް މުހައްމަދު ނަޝީދު ބައިވެރިވެ ވަޑައިގެންފި އެވެ.
މި ހަފްލާގައި ނަޝީދު ބައިވެރިވެވަޑައިގެން، އިންޑިއާގެ 14 ވަނަ ރައީސް ރާމް ނާތު ކޯވިންދުއާ އެކު ނަންގަވާފައިވާ ފޮޓޯއެއް ސޯޝަލްމީޑިއާގައި މިހާރު ދަނީ ދައުރުވަމުންނެވެ.
މި ހަފްލާގައި ރައީސް ނަޝީދު ފިޔަވާ އެއްވެސް ދިވެއްސަކު ބައިވެރިވި ކަމެއް އެނގިފައެއް ނުވެ އެވެ.
އާނަންތު އަމްބާނީގެ ކައިވެނީގެ ހަފްލާގައި އަމްބާނީގެ ދައުވަތަށް ބައެއް ގައުމުގެ ކުރީގެ އިސްވެރިންނާއި ސިޔާސީ ބޭފުޅުންނާއި ނުފޫޒުގަދަ ބޮޑެތި ވިޔަފާރިވެރިންނާއި ދުނިޔޭގެ ނަން މަޝްހޫރު ފަންނާނުންވެސް ބައިވެރިވި އެވެ.
އާނަންތު އާއި ރާދިކާގެ ކައިވެނީގެ ހަފްލާ އޮތީ ރޭ ކުރިއަށް ގެންދިޔައީ މުމްބާއީގެ ޖިއޯ ވޯލްޑް ސެންޓަރުގައެވެ.
ބައެއް ރިޕޯޓްތައް ބުނާ ގޮތުގައި މިއީ މިހާތަނަށް އެންމެ ބޮޑު ހަރަދެއް ކޮށްގެން ދުނިޔޭގައި ބޭއްވި ކައިވެނި ހަފްލާ އެވެ. އެގޮތުން މިހަފްލާއަށް 600 މިލިއަން ޑޮލަރު ހަރަދު ކުރި ކަމަށްވެ އެވެ.
