މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރު (އެމްއައިއޭސީ)ގެ ޗީފް އެގެޒެކެޓިވް އޮފިސަރު (ސީއީއޯ)ގެ މަގާމަށް މީހަކު ހޯދުމަށް އިއުލާންކޮށްފި އެވެ.
މި މަގާމަށް ކުރިމަތިލެވޭނީ ބިޒްނަސް އެޑްމިނިސްޓްރޭޝަން ނުވަތަ މާކެޓިން، ޕަބްލިކް ރިލޭޝަންސްގެ ދާއިރާއިން ލެވެލް ހަތެއްގެ ސަނަދެއް ހާސިލްކޮށްފައިވުމާއެކު ހިންގުމުގެ ދާއިރާގައި ނުވަތަ މާކެޓިން ނުވަތަ ޕަބްލިކް ރިލޭޝަންސްގެ ދާއިރާގައި މަދުވެގެން ހަ އަހަރު ދުވަހު މަސައްކަތްކޮށްފައިވާ މީހުންނަށެވެ.
މި މަގާމަށް ހޮވޭ މީހަކަށް މަހަކު މުސާރައިގެ ގޮތުގައި 20،500 ރުފިޔާއާއި ލިވިން އެލަވަންސްގެ ގޮތުގައި 15،000 ރުފިޔާ ލިބޭނެ އެވެ.
އެމްއައިއޭސީގެ ސީއީއޯގެ މަގާމަށް ފަސް އަހަރަށް ހޮވާ ބޭފުޅެއްގެ މައިގަނޑު މަސައްކަތަކީ އެމްއައިއޭސީގެ މަސްއޫލިއްޔަތު ކަމުގައި ގާނޫނުގައި ބުނާ އެންމެހާ ކަންކަން ކުރުމާއި އިދާރީގޮތުން ފޯރުކޮށްދޭން ޖެހޭ އެހީތެރިކަން ފޯރުކޮށްދިނުމެވެ.
މި ވަޒީފާއަށް ކުރިމަތިލުމަށް ފުރުސަތު ހުޅުވާލާފައިވަނީ މިމަހުގެ 23 ވަނަ ދުވަހުގެ މެންދުރުފަހު 1:30ގެ ނިޔަލަށެވެ.