ރައީސް އިބްރާހީމް މުހައްމަދު ސޯލިހް ސަރުކާރުން ހުޅުމާލޭގައި ހަދާފައިވާ ފްލެޓްތަކާ ގުޅޭ މައްސަލައަކާ ގުޅިގެން މިއަދު ބޭއްވި ޕެޓިޝަން ކޮމިޓީއަށް ހައުސިން މިނިސްޓަރު ޑރ. އަލީ ހައިދަރު އަހްމަދު ހާޒިރުވެވަޑައި ނުގެންނެވި މައްސަލައިގައި ކޮމިޓީގެ ބައެއް މެންބަރުން ނުރުހުން ފާޅުކުރައްވައިފި އެވެ.
ޕެޓިޝަން ކޮމިޓީ މިއަދު ކުރިއަށް ގެންދިއުމަށް ތާވަލްކޮށްފައި އޮތީ ހެނދުނު 11:00 އަށެވެ.
ކޮމިޓީއަށް ހުށަހެޅިފައިވާ މައްސަލައަކީ ގެދޮރުވެރިޔާ ސްކީމުގެ ދަށުން ފްލެޓް ލިބޭނެ ކަމަށް ގެޒެޓްކޮށްފައިވާ އެންމެހާ ފަރާތްތަކާއި އަދި ކަމުގެ މަސްލަހަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށް އެދި ހުށަހަޅާފައިވާ ޕެޓިޝަނެއް ދިރާސާކުރުމެވެ.
ކޮމިޓީގެ ބައްދަލުވުން މިއަދު ފެށުމަށްފަހު މެންބަރުންގެ ކަންބޮޑުވުންތަކާ ގުޅިގެން ކޮމިޓީގެ މުގައްރިރު އަދި ގައްދޫ ދާއިރާގެ މެންބަރު މުހައްމަދު އަލީ ވިދާޅުވީ ކޮމިޓީގެ މިއަދުގެ ބައްދަލުވުމަށް މިނިސްޓަރު ހައިދަރު ވަޑައިގަތުމަށް ކޮމިޓީން ދަންނަވާފައި ނުވާނެ ކަމަށެވެ.
"އަޅުގަނޑުމެން ދެންނެވީ ހުށަހެޅިފައިވާ މައްސަލައާއި ގުޅިގެން ޖަވާބުދާރީވެވޭ ޒިންމާދާރު ބޭފުޅުން ކޮމިޓީއަށް ފޮނުވައިދިނުމަށް. މިނިސްޓަރު ކޮމިޓީއަށް ވަޑައިގަތުމަކީ މިނިސްޓަރުގެ އަމިއްލަފުޅު ނިންމެވުން،" މެންބަރުންގެ ކަންބޮޑުވުންތަކާ ގުޅިގެން މުގައްރިރު ވިދާޅުވި އެވެ.
މުހައްމަދު އަލީ ވިދާޅުވީ މިނިސްޓަރު ހައިދަރަށް ކޮމިޓީއަށް ވަޑައިނުގެންނެވުނީ މިއަދު ހެނދުނު ރައީސް އޮފީހުގައި އޮތް ކެބިނެޓް ބައްދަލުވުމެއް ދިގުލައިގެން ދިއުމުން ކަމަށެވެ. ހެނދުނު 11:00 ޖަހާއިރަށް ކޮމިޓީ ބައްދަލުވުން ތާވަލްކުރީ އެހާއިރަށް ކެބިނެޓް ބައްދަލުވުން ނިމޭނެ ކަމަށް މިނިސްޓަރަށް ލަފާކުރެއްވޭތީ އެގޮތަށް ބައްލަވައިގެން ކަމަށްވެސް މުގައްރިރު ވިދާޅުވި އެވެ.
"ނަމަވެސް ކަންދިމާކުރި ގޮތުން ކެބިނެޓް ބައްދަލުވުން އެހާއިރަށް ނިމޭގޮތް ނުވުމުން މިނިސްޓަރަށް މިގަޑިއަށް ކޮމިޓީއަށް ވަޑައިނުގެންނެވުނީ،" މުހައްމަދު އަލީ ވިދާޅުވި އެވެ.
މިނިސްޓަރު ހައިދަރު ކޮމިޓީއަށް ވަޑައިނުގަތުމުން އެންމެ ބޮޑަށް ނުރުހުން ފާޅުކުރެއްވީ އެމްޑީޕީގެ ވައިކަރަދޫ ދާއިރާގެ މެންބަރު ހުސައިން ޒިޔާދު އެވެ.
އޭނާ ވިދާޅުވީ ކޮމިޓީގެ ބައްދަލުވުމަށް މިނިސްޓަރު ހައިދަރު ވަޑައިނުގަންނަވަންޖެހޭ އެއްވެސް ސަބަބެއް ނެތް ކަމަށާއި މިނިސްޓަރު އަމަލުކުރެއްވި ވަރަށް ޒިންމާދާރުކަން ކުޑަގޮތަކަށް ކަމަށެވެ.
"ވަޒީރުންގެ މިއަމަލަކީ ޣައިރު ޒިންމާދާރު އަމަލެއް. އަޅުގަނޑުމެންނަކީވެސް ރައްޔިތުން އިންތިހާބުކޮށްފައިވާ މެންބަރުން. އަޅުގަނޑުމެންނަށްވެސް ކޮންމެވެސް އިހްތިރާމެއް ކުރަންވާނެ. އަޅުގަނޑުމެން ހުރިހާ މެންބަރުންގެ ވަގުތު ވަޒީރު އެ ބޭކާރުކުރެއްވީ،" ޒިޔާދު ވިދާޅުވި އެވެ.
އޭނާ ވިދާޅުވީ ކޮމިޓީއަކަށް ހާޒިރުވުމަށް މިނިސްޓަރަކަށް އާންމު ގޮތެއްގައި ފަހެއް ނުވަތަ ތިން ދުވަސް ކުރިން ނޯޓިސް ލިބޭނެ ކަމަށެވެ. އަދި ކެބިނެޓް ބައްދަލުވުމެއް އޮންނަކަން މިނިސްޓަރަށް އެނގިވަޑައިގަންނަވަން ވާނީ މިއަދު ކޮމިޓީ ގަޑި ޖެހުމުން ނޫން ކަމަށްވެސް ވިދާޅުވި އެވެ.
ސަރުކާރާ ގުޅިގެން މަސައްކަތް ކުރަމުންދާ ޕާޓީއެއް ކަމަށްވާ އެމްޑީއޭގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވީ މިނިސްޓަރު ހައިދަރު މިއަދު ކޮމިޓީއަށް ވަޑައިނުގެންނެވީ "ހަމަ ގަސްދުގައި" ކަމަށެވެ. އެކަން ތަކުރާރުވާން ފުރުސަތު ދީގެން ނުވާނެ ކަމަށްވެސް ވިދާޅުވި އެވެ.
މިނިސްޓަރު ހައިދަރު ކޮމިޓީއަށް ވަޑައިނުގަތުމުން ސަރުކާރަށް ތާއީދުކުރައްވާ ބައެއް މެންބަރުންވެސް ނުރުހުން ފާޅުކުރެއްވި އެވެ. އެގޮތުން ޕީއެންސީގެ ހެންވޭރު އުތުރު ދާއިރާގެ މެންބަރު އަހްމަދު އައިފާން ވިދާޅުވީ މިނިސްޓަރު ހައިދަރު އަމަލުކުރެއްވީ ރަނގަޅަށް ނޫން ކަމަށެވެ. ގެދޮރުވެރިކަމުގެ މައްސަލަ ހައްލުކުރުމަކީ ރައީސް ޑރ. މުހައްމަދު މުއިއްޒު ވަރަށް ބޮޑަށް އިސްކަންދެއްވާ މައްސަލައަކަށް ވާތީ މިފަދަ މައްސަލައެއް ކޮމިޓީގައި އޮތުމުން މިނިސްޓަރު ވަޑައިގެން މައުލޫމާތު ހިއްސާކުރައްވަންޖެހިވަޑައިގަންނަވާނެ ކަމަށްވެސް ވިދާޅުވި އެވެ.
"އަޅުގަނޑުވެސް ދަންނަވާނީ މިކަން މިވީ އެންމެ ރަނގަޅަކަށް ނޫނޭ. މިނިސްޓަރަށް ނަސޭހަތްތެރިވަން ވާނެ މިކަން ތަކުރާރު ނުކޮށް،" އައިފާން ވިދާޅުވި އެވެ.
އޭނާ ވަނީ މިނިސްޓަރު ހައިދަރަށް ފަސޭހަ ވަގުތެއް ބަލައި މިއަދުގެ ކޮމިޓީ ބައްދަލުވުން އެހެން ދުވަހަށް ތާވަލްކުރުމަށާއި ދެން އޮންނަ ކޮމިޓީ ބައްދަލުވުމަށް ސީދާ މިނިސްޓަރު ހާޒިރުވާން އެންގުމަށް ހުށަހަޅުއްވާފަ އެވެ. މި ހުށަހެޅުން ފާސްވީ ކޮމިޓީގައި އެވަގުތު ތިއްބެވި ހުރިހާ މެންބަރުންގެ އިއްތިފާގުންނެވެ.