މާލެ އާއި ބައެއް ރަށްތަކުގެ ލޯކަލް ކައުންސިލްތަކަށް މެންބަރުން އިންތިހާބުކުރުމުގެ ބައި-އިލެކްޝަންގެ ވޯޓުުލުން ފަށައިފި އެވެ.
މި ބައި އިލެކްޝަންތަކުގެ ވޯޓުލުން ފަށަން އޮތީ މިއަދު ހެނދުނު 8:00 ގައި ނަމަވެސް އެ ގަޑިއަށް ވޯޓުލާން މީހުން ނުދިއުމުގެ ސަބަބުން ބައެއް ފޮށިތަކުގައި އެ ގަޑިއަށް ވޯޓުލުން ފެށިފައިނުވެ އެވެ.
މި އިންތިހާބުތަކުގައި 25 ވޯޓު ފޮށި ބަހައްޓާއިރު ހެނދުނު 8:00 ގައި ވޯޓުލުން ފެށިފައިވަނީ 18 ފޮށީގަ އެވެ.
ވޯޓުލުން ކުރިއަށްދާ ދާއިރާތައް
- ހެންވޭރު ހުޅަނގު ދާއިރާ
- މައްޗަންގޮޅި މެދު ދާއިރާ
- ހުޅުމާލެ ދާއިރާ
- ކުޅުދުއްފުށި އުތުރު ދާއިރާ
- ބިލެތްދޫ ކައުންސިލްގެ ރައީސް
- ރަސްމާދޫ އަންހެނުންނަށް ހާއްސަ ގޮނޑި
މި އިންތިހާބުތަކުގައި ވޯޓުލުމުގެ ހައްގު ޖުމްލަ 13،112 މީހުންނަށް ލިބިފައިވާއިރު އިލެކްޝަންސް ކޮމިޝަނުން ހާމަކުރި ގޮތުގައި ހެނދުނު 11:00 އާ ހަމައަށް ވޯޓުލީ 1،047 މީހުންނެވެ.
ވޯޓުލުން މިއަދު ހަވީރު 4:00 އާ ހަމައަށް ކުރިއަށްދާނެ ކަމަށް އިލެކްޝަންސް ކޮމިޝަނުން ބުނެ އެވެ.