ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާއި ހަވާލުވީ ދުވަހުން ފެށިގެން މި މަހުގެ 15 ވަނަ ދުވަހުގެ ނިޔަލަށް 2،069 ބިދޭސީން ޑީޕޯޓުކޮށްފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފި އެވެ.
އިމިގްރޭޝަނުން މިހާރު ގެންދަނީ ގަވާއިދާ ހިލާފަށް އުޅޭ ބިދޭސީންގެ މައްސަލައަށް ތިން އަހަރު ދުވަހުގެ ތެރޭގައި ވަށާޖެހޭ ހައްލެއް ގެނައުމަށް މަސައްކަތްތަކެއް ކުރަމުންނެވެ. މި މަސައްކަތުގެ ތެރެއިން މިދިޔަ އަށް މަހުގެ ތެރޭގައި 153 ތަނެއް ބަލައި ފާސްކޮށް 2،069 ބިދޭސީން ޑީޕޯޓްކޮށްފައިވާ ކަމަށް އިމިގްރޭޝަނުން ބުނެ އެވެ.
ޑީޕޯޓުކުރި ބިދޭސީންގެ ތެރޭގައި ކަޅު ބާޒާރުގައި ބޭރު ފައިސާގެ މުއާމަލާތް ކުރަމުންދިޔަ ބިދޭސީންނާއި، ހަށި ވިއްކުމުގެ ވިޔަފާރި ކުރަމުންދިޔަ ބިދޭސީންނާއި، ޑްރަގު އަދި ގޭންގް މާރާމާރީތަކުގައި އުޅުނު ބިދޭސީންނާއި، ވިސާއާއި އެހެން ލިޔެކިޔުންތަކަށް ބަދަލު ގެނައި ބިދޭސީންނާއި އިމިގްރޭޝަނުން ބަލަމުންދިޔަ މައްސަލަތަކުގައި ހޯދުނު ބިދޭސީން ހިމެނެބ އެވެ.
މީގެއިތުރުން ޓޫރިސްޓް ވިސާގައި ރާއްޖެ އައިސް މަސައްކަތް ކުރަން އުޅުނު 1،289 ބިދޭސީންނާއި ވާކް ޕާމިޓާއި ވޯކް ވިސާ ފޯޖުކޮށްގެން ރާއްޖެ އެތެރެވާން އުޅުނު 22 ގައުމަކަށް ނިސްބަތްވާ 341 ބިދޭސީން ވެސް އިމިގްރޭޝަނުން ވަނީ ހުއްޓުވާފަ އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި އެފަދަ މީހުންގެ މައުލޫމާތު ރިޕޯޓު ކުރުމަށް "އިމިގްރޭޝަން ވޮޗް"ގެ ނަމުގައި އޮންލައިން ޕޯޓަލެއް ވެސް އިމިގްރޭޝަނުން މިހާރު ވަނީ ތައާރަފްކޮށްފަ އެވެ.