ރާއްޖެއަށް ކުރިމަތިވެފައިވަނީ ވަގުތީ އިގްތިސާދީ ދަތިކަމެއް ކަމަށާއި މި ދަތިތަކުން އަރައިގަތުމަށްޓަކައި ދުނިޔޭގެ އެކި ލީޑަރުން އެހީތެރިކަން ފޯރުކޯށްދެއްވަމުން ގެންދަވާ ކަމަށް ފޮރިން މިިނިސްޓަރު މޫސާ ޒަމީރު ވިދާޅުވެއްޖެ އެވެ.
މިނިސްޓަރު ޒަމިރު ރޭ ވިދާޅުވީ ރާއްޖޭގެ އިގްތިސާދީ ހާލަތު ރަނގަޅު ކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތްތައް ދުނިޔޭގެ އެކި ލީޑަރުން ބަލަައިގަންނަ ކަމަށާއި މި ދަތިކަމަކީ ކުޑަ ދުވަސްކޮޅަކަށް ދެމިގެންދާނޭ ދަތިކަމެއް ކަމަށް އެ ބޭފުޅުން ގަބޫލުކުރައްވާ ކަމަށެވެ.
ޗައިނާގެ ފޮރިން މިިނިސްޓަރުގެ ދައުވަތަކަށް ދާދި ފަހުން ޒަމީރުވެސް ހިމެނޭ ގޮތަށް ރާއްޖޭގެ ތިން މިނިސްޓަރަކު ވަނީ ޗައިނާއަށް ރަސްމީ ދަތުރެއް ކުރައްވާފަ އެވެ. މިދަތުރުގައި ޗައިނާގެ ރައީސް ޝީ ޖިންފިން ދެއްވި ނޯޓެއް ލިބިވަޑައިގެންނެވި ކަމަށާއި އެ ނޯޓުގައި ޝީ ވިދާޅުވެފައިވަނީ ރާއްޖޭގެ އިގްތިސާދީ ދަތިކަމަކީ ވަގުތީ ކަމެއް ކަމުގައި ޒަމީރު ވިދާޅުވި އެވެ.
"އެކަމުން އަރައިގަތުމަށް ކުރަންޖެހޭ ޓެކްނިކަލް މަސައްކަތްތައްކޮށް، އެހީތެރިކަން ފޯރުކޯށްދޭނެ ކަމުގެ ޔަގީންކަން ދެއްވާފައި އޮތީ،" ޝީ ވިދާޅުވި އެވެ.
ޒަމީރު ވިދާޅުވީ އިގްތިސާދީ ދަތިތައް ހައްލުކުރުމަށްޓަކައި އެކި ގައުމުތަކުގެ ލީޑަރުންގެ ފަރާތްޕުޅުން އެހީތެރިކަމާއި ފަންނީ ލަފާ ލިބިވަޑައިގަންނަވާ ކަމަށެވެ. ރާއްޖޭގެ އިގްތިސާދު ރަނގަޅު ކުރުމަށް ވެދޭ އެހީތެރިކަމަކީ ހަމައެކަނި އެހީގެ ފައިސާ ދިނުން ނޫން ކަމަށާއި ލޯނުތައް ދައްކަންޖެހިފައިވާ މުއްދަތުތަކަށް ބަދަލު ގެނެސްދިނުމަކީ މިވަގުތަށް ވެވޭނެ އެހީއެއް ކަމަށް ވިދާޅުވި އެވެ.
މިނިސްޓަރު ވިދާޅުވީ ރާއްޖެއިން ދައްކަންޖެހިފައިވާ ލޯނުތަކުން ތަކުގެ ތެރެއިން އިންޑިއާއަށް ދައްކަންޖެހޭ ޕޭމަންޓުތަކުގެ ތެރެއިން 50 މިލިއަން ޑޮލަރު މިހާރު ވަނީ ފަސްކޮށްދީފައި ކަމަށާއި ރައީސްގެ ވިސްނުން ފުޅަކީ އެގޮތަށް ލިބޭ ފިސްކަލް އިގްތިސާދު ފުޅާކޮށް، ލޯނުގެ މައްސަލައާއި އިގްތިސާދީ މައްސަލަތައް ހައްލުކުރުން ކަމަށެވެ.
މިނިސްޓަރު ޒަމީރު އިތުރަށް ވިދާޅުވީ އިންޑިއާއިން ގެންގުޅެނީ ނެއިބާހުޑް ފަސްޓް ޕޮލިސީ ކަމަށްވާތީ އިގްތިސާދީ ދަތިކަމުން އަރައިގަތުމަށް އެ ގައުމުން ވަރަށް ބޮޑަށް ލަފައާއި އިރުޝާދު އަދި އެހީތެރިކަން ފޯރުކޮށްދެމުންދާ ކަމަށެވެ.
ޒަމީރު ވިދާޅުވީ އިގްތިސާދީ ދަތިކަމުން އަރައިގަތުމަށްޓަކައި ރައީސް މުއިއްޒުގެ އިގްތިސާދީ އެޖެންޑާ ކުރިއަށް ގެންދަވާނަމަ ރާއްޖޭގެ ހާލަތު ވަރަށް ބޮޑަށް ރަނގަޅު ވެގެންދާނެ ކަމަަށް ރާއްޖެއާ ގުޅުން ބާއްވާ ގައުމުތަކުންވެސް ގަބޫލުކުރާ ކަމަށެވެ. ރާއްޖެއަށް މިވަގުތަށް ކޮންމެހެން ބޭނުންވާ ވަގުތީ އެހީތެރިކަން ފޯރުކޮށްދެމުންދާނެ ކަމަށްވެސް އެކުވެރި ގައުމުތަކުން ބުނާ ކަމަށްވެސް ޒަމީރު ވިދާޅުވި އެވެ.