އިޓަލީގެ ތަރި ރިކާޑޯ ކަލަފިއޮރީގެ ސޮއި ހޯދަން އާސެނަލް އިން ކުރަމުން އައި މަސައްކަތް އެ ޓީމުން ކާމިޔާބުކޮށްފި އެވެ.
އުމުރުން 22 އަހަރުގެ ކަލަފިއޮރީ އާސެނަލްއަށް ސޮއި ކޮށްފައިވަނީ 42 މިލިއަން ޕައުންޑަށް ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން 2029 އާއި ހަމައަށް އޭނާ އާސެނަލްގައި މަޑު ކުރާނެ އެވެ.
އާސެނަލްގެ އިތުރުން ކަލަފިއޮރީގެ ސޮއި ހޯދަން ޔުވެންޓަސް އާއި ރެއާލް މެޑްރިޑުންވެސް މަސައްކަތް ކޮށްފައިވެ އެވެ. ނަމަވެސް ކަލަފިއޮރީ ބޭނުންވީ އާސެނަލް އަށް ދިޔުމަށެވެ.
ކަލަފިއޮރީ އާސެނަލްއަށް ސޮއިކުރުމުން އެ ޓީމުގެ ކޯޗު އާޓެޓާ ބުނެފައިވަނީ އާސެނަލް އިން ކަލަފިއޮރީގެ ކުޅުން އޭނާ ބަލަމުންދާތާ އަހަރަކަށް ވުރެ ގިނަ ދުވަސް ވެއްޖެ ކަމަށާއި ކަލަފިއޮރީ އާސެނަލްއަށް ގެނެވޭ ގޮތް ވުމުން އުފާކުރާ ކަމަށެވެ.
އާޓެޓާ އާސެނަލްއަށް ގެންދިއުމުން އެ ޓީމުގެ ފަހަތަށް ދިމާވަމުން އައި މައްސަލަ ތަކަށް ހައްލެއް ލިބޭނެ ކަމަށް އުއްމީދު ކުރާ ކަމަށާއި ސަލީބާ އާއި އެއް ފެންވަރުގެ އިތުރު ކުޅުންތެރިޔަކު ލިބުމުން އިދިކޮޅު ޓީމު ތަކަށް އުނދަގޫ ވާާނެ ކަމަށްވެސް ކޯޗު ބުންޏެވެ.
މިހާރު ހަމައެކަނި އުފެދިފައިވާ ސުވާލަކީ ކަލަފިއޮރީ ފެނިގެންދާނީ އާސެނަލްގެ ފަހަތުން ކޮން މަގާމަކަށްތޯ އުފައްދާ ސުވާލެވެ. މިސުވާލުގެ ޖަވާބުގައި އާޓެޓާ ބުނީ ސީދާ ފަހަތަށް ކުޅެން ޖެހުނަސް އަރިމަތިން ފަހަތަށް ކުޅެން ޖެހުނަސް ކަލަފިއޮރީ ފިޓުވާނެ ކަމަށެވެ.
ކަލަފިއޮރީގެ ސޮއި ހޯދުމަށްފަހު މިހާރު އެ ޓީމުން އަންނަނީ ސްޕެއިންގެ ހުނަރުވެރި މިޑްފީލްޑަރު މިކޭލް މެރީނޯގެ ސޮއި ހޯދުމުގެ މަސައްކަތްވެސް ކުރަމުންނެވެ.