އިމިގްރޭޝަން ގާނޫނާ ހިލާފުވި ނޯވޭގެ ފަތުރުވެރިޔަކު ރާއްޖެއިން ޑީޕޯޓްކޮށްލައިފި އެވެ.
މޯލްޑިވްސް އިމިގްރޭޝަނުން މިރޭ ބުނީ މި މީގާ ރާއްޖެ އައީ މިދިޔަ ޑިސެމްބަރު 20 ވަނަ ދުވަހު ކަމަށެވެ.
ވިސާގެ މުއްދަތު ހަމަވުމުން މި މީހާ ވަނީ ރާއްޖޭގައި މަޑުކުރުމަށްފަހު ރާއްޖޭގެ ބޯޓެއްގައި މަސްވެރިކަން ކުރަން ފަށާފަ އެވެ.
އިމިގްރޭޝަން މިރޭ ބުނީ މި މީހާ ރާއްޖޭގައި ދިރިއުޅެމުންދާ ކަމަށް ލިބުނު މަޢުލޫމާތަކާ ގުޅިގެން މިދިޔަ މަހުގެ 25 ވަނަ ދުވަހު ފުލުހުންގެ އެހީތެރިކަމާއެކު މި މީހާ އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
"އަދި އިމިގްރޭޝަންގެ ގާނޫނާއި ހިލާފުވެފައިވާތީ އޭނާ ވަނީ މިހާރު ޑީޕޯޓުކޮށްފައި،" އިމިގްރޭޝަނުން ބުންޏެވެ.