ރައީސް ޑރ. މުހައްމަދު މުއިއްޒުގެ ސަރުކާރުން ރާއްޖޭގެ ހަތަރު ސަރަހައްދެއްގައި އަޅަން ނިންމާފައިވާ ދަނާލް އެޅުމުގެ މަސައްކަތް އަންނަ އަހަރު ފަށާނެ ކަމަށް ހަޔާ އެޑިޔުކޭޝަން މިނިސްޓްރީން ބުނެފި އެވެ.
އެ މިނިސްޓްރީގެ އޮފިޝަލަކު އަވަސްއަށް މިއަދު މައުލޫމާތު ދެއްވަމުން ވިދާޅުވީ ދަނާލްތަކުގެ މަސައްކަތް ފެށޭނީ އެ މަސައްކަތަށް ބޭނުންވާ ފައިސާ އަންނަ އަހަރުގެ ދައުލަތުގެ ބަޖެޓުގައި ހިމަނައިގެން ކަމަށްވާތީ ބަޖެޓްގައި އެ ފައިސާ ހިމަނާނެ ކަމަށެވެ.
"އަޅުގަނޑުމެން ބެލިން މިއަހަރުވެސް އެ މަސައްކަތް ކުރެވޭނެ ގޮތެއް އޮތްތޯ. އެކަމަކު ބަޖެޓުގެ ދަތިކަން އުޅޭތީ އަމަލީ މަސައްކަތް ކުރިއަށް ގެންދިއުމަށް ދަތިތަކެއް ދިމާވި،" އޮފިޝަލް ވިދާޅުވި އެވެ.
ދަނާލު އެޅުމަށް ސަރުކާރުން ނިންމާފައިވަނީ ރ. ދުވާފަރު، ރ. ހުޅުދުއްފާރު، ގއ. ވިލިނގިލި އަދި ފުވައްމުލަކު ގައެވެ.
އޮފިޝަލް އިތުރަށް ވިދާޅުވީ މޯލްޑިވްސް ނެޝަނަލް ޔުނިވަސިޓީ އިން ފުވައްމުލަކުގައި ދަނާލެއް އެޅުމުގެ މަސައްކަތް ކުރާތީ އެ ސިޓީގައި ސަރުކާރުން އިތުރު ދަނާލެއް އަޅާނަމަ އެކަން ކުރާނީ ޔުނިވަސިޓީގެ ދަނާލްގެ މަސައްކަތްތައް ކުރިއަށްދާ ގޮތް ބެލުމަށްފަހު ކަމަށެވެ.
ރަށްރަށުގައި ދަނާލްތައް އަޅަނީ އަމިއްލަ ރަށުން ލިބެން ނެތް ތައުލީމުގެ ފުރުސަތުތައް ހޯދުމަށް އާއިލާއާ އެކު ކައިރި ރަށްރަށަށް ގޮސް އެ ރަށްރަށުގައި އަގުހެޔޮކޮށް ތިބެގެން ކިޔެވުމަށް މަގުފަހިކުރުމަށް ކަމަށް ހަޔާ އެޑިޔުކޭޝަން މިނިސްޓްރީން މައުލޫމާތުދެ އެވެ.