ޕްރޮގްރާމް އޮޑިޓްކުރުމަށް މޯލްޑިވިސް ކޮލިފިކޭޝަންސް އޮތޯރިޓީ (އެމްކިޔުއޭ)އަށް ހުށަހަޅާފައިވާ 10،000 ފޯމުގެ ތެރެއިން 6،830 ފޯމުގެ މަސައްކަތް ނިންމާލައިފި އެވެ.
އެމްކިއުއޭ އިން ބުނީ މިފަދަ އޮޑިޓެއްގެ ބޭނުމަކީ ރާއްޖޭގައި ކުރިއަށް ގެންދާ މަތީ ތައުލީމާއި ތަމްރީން ޕްރޮގްރާމްތަކަކީ ފެންވަރު ރަނގަޅު ޕްރޮގްރާމްތަކަކަށް ހެދުން ކަމަށެވެ.
މަތީ ތައުލީމާއި ތަމްރީނުތަށް ފޯރުކޮށްދޭ މަރުކަޒުތައް ބަލައި ޗެކްކުރުމާއި، އެ މަރުކަޒުތަކުން ހިންގާ ކޯސްތަކާއި ޕްރޮގްރާމްތަކުގެ ފެންވަރު ކަނޑައަޅައި، އެ ޕްރޮގްރާމްތަށް ކުރިއަށް ގެންދަނީ ގާނޫނާއި ގަވާއިދާ އެއްގޮތަށްތޯ ބަލައި ޔަގީންކުރަމުންދާ ކަމަށްވެސް އެމްކިއުއޭ އިން ބުންޏެވެ.
އެމްކިއުއޭ އިން ބުނީ ސަރުކާރުގެ ސިޔާސަތަކީ ރާއްޖޭގެ ކޮންމެ ހިސާބަކުންވެސް މަތީ ތައުލީމަށް ކިޔެވުމުގެ ފުރުސަތު ފަހިކޮށްދިނުމާ އެކު ރާއްޖެއަށް އެކި ދާއިރާތަކުން ބޭނުންވާ މީހުން ބިނާކުރުން ކަމަށެވެ. އެހެންވެ އެމްކިޔުއޭ އިން އަންނަނީ ޕްރޮގްރާމް އޮޑިޓް، ރިކޮގްނިޝަން ވެލިޑޭޝަން ފަދަ މަސައްކަތްތައް ހަރުދަނާ ކަމާ އެކު ކުރަމުން ކަމަށްވެސް ބުންޏެވެ.
ރާއްޖޭގައި ކޮންމެ އަހަރަކުވެސް އެެތައް ބަޔަކު މަތީ ތައުލީމުގެ ކޯސްތައް ނިންމައިގެން ވަޒީފާގެ މައިދާނަށް ނިކުންނައިރު ވަޒީފާ ނުލިބުމަކީ އެތައް ބައެއްގެ ޝަކުވާއަކަށް ވެސް ވެފައި އޮންނަ ކަމެކެވެ.