މޯލްޑިވްސް ޕޮލިޓެކްނިކް ޒަމާނާ އެއްގޮތަށް ރީބްރޭންޑް ކުރުމަށް ނިންމާފައިވާ ކަމަށް ހަޔަ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.
މިނިސްޓަރު ވިދާޅުވީ ޕޮލިޓެކްނިކް ޒަމާނާ އެއްގޮތަށް ރީބްރޭންޑް ކުރުމަށް ނިންމާފައިވާތީ ވަރަށް އަވަހަށް އެ މަސައްކަތް ފަށާނެ ކަމަށެވެ.
މާރިޔާ ވިދާޅުވީ ޕޮލިޓެކްނިކް ރީބްރޭންޑް ކުރާނީ ޒަމާނީ ތައުލީމު ދެވޭ ގޮތަށް އަދި ތަނުގައި ކިޔަވާ ދަރިވަރުންނަށް އެ ތަނަކީ އުފާވެރިކަމާއެކު ކިޔެވުގެ މާހައުލެއް އޮތް ތަނެއްގެ ގޮތަށް ކަމަށެވެ.
"ހަގީގަތުގައި މިހާރުގެ ޒުވާނުންނަށް އުފާވެރި މާހައުލެއްގައި ކިޔެވޭނެ މަގުތަނަވަސްވެފައި އޮތުން މުހިއްމު،" މާރިޔާ ވިދާޅުވި އެވެ.
މިނިސްޓަރު ވިދާޅުވީ އެފަދަ މާހައުލެއް ޕޮލިޓެކްނިކުގައި މިވަގުތު ނެތް ކަމަށާއި ދަރިވަރުންގެ ފަރާތުންވެސް އެ ޝަކުވާތައް ލިބޭ ހިފަމުން ނުދާ ކަމަށެވެ.
"އެތަން ޒަމާނީކުރާއިރު އެންމެ ފަހުގެ މޮޑެލަށް، ޒަމާނީ ވަސީލަތްތަކާއެކު ކިޔަވައި ދޭނަން" މާރިޔާ ވިދާޅުވި އެވެ.
މިނިސްޓަރު ވިދާޅުވީ ޒުވާނުންނަށް ބޭނުންވާ ތަފާތު ރޮނގުތަކުން އޮންލައިންކޮށް ކިޔެވުމުގެ ފުރުސަތު ފަހިކޮށްދިނުމުގެ ވިސްނުންވެސް ގެންގުޅުއްވާ ކަމަށެވެ.
މޯލްޑިވްސް ޕޮލިޓެކްނިކަކީ އެކި ދާއިރާތަކުން ރާއްޖެއަށް ބޭނުންވާ ހުނަރުވެރި މަސައްކަތްތެރިން ތަމްރީނު ކުރުމަށް 2010 ވަނަ އަހަރު އުފައްދާފައިވާ ތަނެކެވެ. ޕޮލިޓެކްނިކްގެ ކެމްޕަސްތައް ރާއްޖޭގެ އެކި ސަރަހައްދުތަކުގައި ގާއިމުކޮށް ޒުވާނުން ތަމްރީންކުރުމުގެ މަސަކަތް ސަރުކާރުން ދަނީ ކުރަމުންނެވެ.