ހަވަނަ "ކްރިއޭޓިވިޓީ އިން އެޑިޔުކޭޝަން" ސަމިޓްގައި ހަޔާ އެޑިޔުކޭޝަން މިނިސްޓަރު ޑރ. މަރްޔަމް މާރިޔާ ބައިވެރިވަޑައިގަންނަވައިފި އެވެ.
ޔުނެސްކޯ އަދި ގްލޯބަލް ކްރިއޭޓިވް ތިންކިން އިންސްޓިޓިއުޓުން އިންތިޒާމްކުރާ މި ކޮންފަރެންސް ކުރިއަށް ދިޔައީ މިމަހުގެ 17 އަދި 18 ވަނަ ދުވަހު ފްރާންސްގެ ވެރިރަށް ޕެރިސް ގައެވެ.
މި ސަމިޓަކީ ދުނިޔޭގެ އެކި ކަންކޮޅުތަކުގެ ތަޖުރިބާކާރު އިލްމީ ބޭފުޅުންނާއި ތައުލީމީ ދާއިރާގައި މަސައްކަތްކުރައްވާ އިސްބޭފުޅުންގެ މެދުގައި، ތައުލީމީ ދާއިރާގައި އުފެއްދުންތެރިކަން އިތުރުކުރުމާ ގުޅޭގޮތުން މަޝްވަރާކޮށް، މައުލުމާތު ހިއްސާކުރުމަށް ބާއްވާ ސަމިޓެކެވެ.
މި ސަމިޓްގައި މިނިސްޓަރު މާރިޔާ ވަނީ ގްލޯބަލް ކްރިއޭޓިވް ތިންކިން އިންސްޓިޓިއުޓްގެ ފްރޭންކް ލޯ، ޗެއާ އޮފް ޔުނެސްކޯ-އައިއައިޓީއީ ގަވާނިން ބޯޑް، ޕްރޮފެސަރު އާޝާ ކަންވަރް އަދި ޑައިރެކްޓާ އޮފް ޔުނެސްކޯ-އައިއައިޓީއީ ޓައޯ ޒަންއާ ބައްދަލުކުރައްވާފަ އެވެ. މީގެ އިތުރުން ސީޝެލްސްގެ އެޑިޔުކޭޝަން މިނިސްޓަރު ޖަސްޓިން ވެލެންޓިންއާ ވެސް އެކަމަނާ ބައްދަލުކުރައްވާފައިވެ އެވެ.