ބަންގްލަދޭޝްގެ ބޮޑުވަޒީރު ޝައިހް ހަސީނާ މަގާމުން އިސްތިއުފާ ދެއްވުމަށްފަހު ގައުމުން ފުރާވަޑައިގެންފި އެވެ.
ހަސީނާ މަގާމުން އިސްތިއުފާ ދެއްވުމަށްފަހު ފިއްލަވާފައި މިވަނީ އެ ގައުމުގައި އޭނާގެ ވެރިކަމާ ދެކޮޅަށް ވަރުގަދަަ މުޒާހަރާތަކެއް ފަށައި، އެތައް ބަޔަކު މަރުވެފައި ވަނިކޮށް ކަމަށެވެ.
ބަންގްލަދޭޝްގެ ނޫސްތަކުގައި ރިޕޯޓުކޮށްފައިވާ ގޮތުން ހަސީނާ މަގާމުން އިސްތިއުފާ ދެއްވުމަށްފަހު ހެލިކޮޕްޓަރެއްގައި ފުރާވަޑައިގަތީ އެ ގައުމުގައި މުޒާހަރާ ކުރާ މީހުން ރިޔާސީ ގަނޑުވަރާ ހަމައަށް ކައިރިވެ ގަނޑުވަރަށް ގާއުކަން ފެށުމުން ގޮތް ހުސްވެގެންނެވެ.
ހަސީނާ ފިއްލަވައިގެން ވަޑައިގެންނެވީ އަވަށްޓެރި އިންޑިއާއަށް ކަމަށްވެސް ރިޕޯޓްތައް ބުނެ އެެވެ.
ރިޔާސީ ގަނޑުވަރާ ހަަމައަށް މުޒާހަރާގެ ބައިވެރިންނަށް އާދެވުނީ ސަލާމަތީ ބާރުތައްވެސް ބައިބައިވެ އެ މީހުންގެ ސަފުތައް ރޫޅުމުން ކަމަށް މީޑިއާ ރިޕޯޓްތައް ބުނެ އެވެ.
އިސްތިއުފާ ދެއްވުމަށް ހަސީނާއަށް މަޖުބޫރުވީ އެ ގައުމުގައި ސިވިލް ސާވިސްގެ މަގާމުތަކަށް މީހުން ނެގުމުގައި އަމަލުކުރަމުން އައި އުސޫލަށް ބަދަލު ގެނައުމަށް އާންމުން ކުރި އާދޭހާއި މިނިވަން އިންތިހާބެއް ބޭއްވުމަށް ގޮވާލައި އިދިކޮޅު ޕާޓީތަކުން ހުށަހެޅި ހުށަހެޅުންތަކަށް ބީރުކަންފަތެއް ދެއްވުމާ ގުޅިގެން ގޮތް ހުސްވެގެން ކަމަށްވެ އެވެ.
ބަންގްލަދޭޝްގެ ސަލާމަތީ ބާރުތަކުން ދަނީ ބަރު ހަތިޔާރާއެކު މަގުތަކުގައި ފޯރި މަރަމުންނެވެ.
ބަންގަލްދޭޝްގައި ކުރިއަށްދާ މުޒާހަރާތަކުގައި މިހާތަނަށް ސިފައިންނާއި ފުލުހުންގެ ތެރެއިން 20 މީހުން މަރުވެފައިވާއިރު، އާންމުންގެ ތެރެއިން 300 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނެ އެވެ.
މީގެ އިތުރުން އެތައް ތަނެއްގައި ރޯކޮށް އަންދާލާފައިވާއިރު މުޒާހަރާތައް މައިތިރި ކުރުމަށްޓަކައި އިންޓަނެޓްގެ ހިދުމަތްވެސް ވަނީ މެދުކަނޑާލާފަ އެވެ.