މަސްތުވެގެން ހުރެ ނެޝަނަލް ޑްރަގް އެޖެންސީ (އެންޑީއޭ)ގެ ތަކެއްޗަށް ގެއްލުން ދިން މީހާ، މަސްތުވާތަކެތީގެ މައްސަލައެއްގައި އަނެއްކާވެސް ހައްޔަރުކޮށްފި އެވެ.
ނެޝަނަލް ޑްރަގް އެޖެންސީ އަކީ މަސްތުވާތަކެއްޗާ ބެހޭ ގާނޫނާއި ގާނޫނާ ގުޅިފައިވާ މައިގަނޑު ސިޔާސަތުތައް، ނެޝަނަލް ޑްރަގް ކޮންޓްރޯލް ކައުންސިލުގެ ލަފާއާއި މަޝްވަރާގެ މަތިން ރައީސުލްޖުމްހޫރިއްޔާ ކަނޑައެޅުއްވުމުން، އެ ސިޔާސަތުތައް ތަންފީޒުކުރާ ސަރުކާރުގެ މައިގަނޑު އިދާރާ އެވެ.
އެންޑީއޭގެ ތަކެއްޗަށް މިދިޔަ ޖޫން މަހުގެ ތެރޭގައި ގެއްލުން ދިނީ ގ. ބޮޑުފެންވަޅުގޭ، ހުސައިން އިހްސާން މުސްތަފާ އެވެ.
މަސްތުވާތަކެތީގެ މައްސަލައެއްގައި އެ ފަހަރުވެސް ހުސައިން އިހްސާން މުސްތަފާ ހައްޔަރުކޮށް މުއްދަތު ޖެހި އެވެ. އެ ފަހަރު އޭނާގެ ބަންދަށް ފަސް ދުވަސް ޖެހިއިރު، އަލުން އޭނާ މަސްތުވާތަކެތީގެ މައްސަލައެއްގައި ހައްޔަރުކޮށް އިއްޔެ ވަނީ 30 ދުވަސް ބަންދަށް ޖަހާފަ އެވެ.
އުމުރުން 43 އަހަރުގެ އިހްސާންގެ ބަންދު އަމުރު ރިޕޯޓުން އެނގޭ ގޮތުގައި އޭނާ މީގެ ކުރިންވެސް މަސްތުވާތަކެތީގެ މައްސަލަތަކުގައި އެއް ފަހަރަށް ވުރެ ގިނަ ފަހަރު ހައްޔަރުކޮށްފައިވެ އެވެ.