ހުޅުމާލޭގައި އިމާރާތްކޮށްފައިވާ ވިނަރެސް ފްލެޓްތަކުގެ އެކްސެސް ކޮންޓްރޯލް ސިސްޓަމާއި ދޮރުތަކަށް ލިބިފައިވާ ގެއްލުންތައް މަރާމާތުކޮށް އާދިއްތަ ދުވަހުން ފެށިގެން އަލުން ބޭނުންކުރަން ނިންމައިފި އެވެ.
މިކަން ހާމަކޮށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ވިނަރެސްގެ އެކްސެސް ޓެގު ނުނަގާ މީހުން ވީ އެންމެ އަވަހަކަށް އެކްސެސްޓް ޓެގު ނެގުމަށް އެދިފަ އެވެ.
ޓެގު ދޫކުރަނީ ވިނަރެސް 10 ގެ މެނޭޖްމަންޓް އޮފީހުންނެވެ.
ވިނަރެސްގެ އެކްސެސް ކޮންޓްރޯލް ސިސްޓަމަކީ އިމާރާތުގައި ދިރިއުޅޭ މީހުންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ގާއިމުކޮށްފައިވާ ހިދުމަތެއްކަން އެޗްޑީސީ އިން ވަނީ ފާހަގަކޮށްފަ އެވެ. މި ތަކެއްޗަށް ގެއްލުން ދިނުމަކީ މި ހިދުމަތް ބޭނުންކުރާ އެންމެންގެ ހައްގަށް އުނިކަން ލިބޭނެ ކަމެއްކަން އެޗްޑީސީން ބުނެ އެވެ.
މިތަކެއްޗަށް ގެއްލުންދޭ މީހުންނަށް ފިޔަވަޅު އަޅަމުން ގެންދާނެ ކަމަށް އެޗްޑީސީ އިން ވަނީ ބުނެފަ އެވެ.