މީހުންނަށް ދިރިނޫޅެވޭ ވަރަށް ވިރާނާވެފައިވާ ގެއެއްގައި ގަވާއިދާ ހިލާފަށް ދިރިއުޅެމުން ދިޔަ ތިން ބިދޭސީން މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
އިމިގްރޭޝަނުން ބުނީ ބިދޭސީންގެ މައްސަލަތައް ރިޕޯޓްކުރުމަށް ގާއިމުކޮށްފައިވާ "އިމިގްރޭޝަން ވޮޗް" އަށް ލިބުނު ރިޕޯޓަކާ ގުޅިގެން މިއަދު ހެނދުނު ކުރިއަށް ގެންދިޔަ ރެއިޑެއްގައި މި ގެ ބަލާފައިވާ ކަމަށެވެ.
ރިޕޯޓުކޯށްފައިވަނީ ދިރިނޫޅެވޭ ވަރަށް ވީރާނާވެފައިވާ ގެއެއްގައި ވިޔަފާރިއަށް އެކިކަހަލަ ކާބޯތަކެތި ތައްޔާރުކުރަމުންދާ މައްސަލައެއް ކަމަށް އިމިގްރޭޝަނުން މައުލޫމާތު ދިނެވެ.
އިމިގްރޭޝަނުން ބުނީ މިތަން ބަލައި ފާސްކުރިއިރު އާންމު ފިހާރަތަކުގައި ވިއްކަން ހުންނަ ގިނަ އަދަދެއްގެ ކާބޯތަކެތި މި ގޭ ތެރެއިން ފެނިފައިވާތީ ކަމާބެހޭ އިދާރާތަކުގެ ސަމާލުކަމަށް އެކަން ގެނެސްފައިވާނެ ކަމަށެވެ.
ގަވާއިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރިއަށް ގެންދާ އޮޕަރޭޝަންތަކުގެ ތެރެއިން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މިހާތަނަށް ވަނީ 2000 އަށް ވުރެ ގިނަ ބިދޭސީން ޑީޕޯޓުކޮށްފަ އެވެ. އަދި އެތައް ބިދޭސީއެއް އިމިގްރޭޝަންގެ ބެލުމުގެ ދަށުގައި މިވަގުތުވެސް އެބަތިއްބެވެ.
ރާއްޖޭގައި ގާނޫނާއި ގަވައިދާ ހިލާފަށް އުޅޭ ބިދޭސީންގެ މައްސަލައަށް ކުރިއަށް އޮތް ތިން އަހަރުގެ ތެރޭގައި ވަށާޖެހޭ ހައްލެއް ގެންނާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އަދި އިމިގްރޭޝަން ކޮންޓްރޯލާ މުހައްމަދު ޝަމްއާން ވަނީ ވިދާޅުވެފަ އެވެ.