ބަނގުރާ ބޯކަމަށް އިއުތިރާފުވި މީހަކު ޖަލްދު ކުރުމަށް ކްރިމިނަލް ކޯޓުން ހުކުމްކޮށްފި އެވެ.
''ޖަލްދުކުރުން'' ކަމަށް ގާނޫނުލްއުގޫބާތުގައި ބުނެފައިވަނީ ހަށިގަނޑަށް ނުރައްކާތެރި އަނިޔާ ނުލިބޭނޭ ގޮތެއްގެ މަތިން އަދަބެއް ރަމްޒުކޮށްދިނުމުގެ ގޮތުން ހަންމުށިން ނުވަތަ ދުއްރައިން މީހެއްގެ ގައިގާ ތަޅާތެޅުމަށެވެ.
ބަނގުރާ ބޯ ކަމަށް އިއުތިރާފުވުމުން 40 އެތިފަހަރުން ޖަލްދު ކުރަން ހުކުމްކޮށްފައިވަނީ ށ. މިލަންދޫ މީހެއްގެ މައްޗަށެވެ.
އޭނާގެ މައްޗަށް ޖަލްދު ކުރުމުގެ އިތުރުން 27 ދުވަހަށް ޖަލަށްލުމަށް ހުކުމް ކުރި އެވެ. އެހެންނަމަވެސް އޭނާގެ ޖަލު ހުކުމުގެ ބައި ކޯޓުން ވަނީ ޖޫރިމަނާއަކަށް ބަދަލުކޮށްފަ އެވެ. އޭނާ ޖޫރިމަނާކޮށްފައިވަނީ 10،667 ރުފިޔާއިންނެވެ.
ޖަލްދު ކުރާ ވަގުތު އެ އަދަބަކަށް ހުއްދަ ކުރެވިގެންވާ ހުރިހާ އެތިފަހަރެއް ޖަހަންވާނީ އެކަކު ކަމަށާއި ޖަލްދު ކުރާ މީހާގެ އަތުގެ ކުޑަހުޅު ނޫނީ ލަންބައިގެން ނުވާނެ ކަމަށް ބުނެފައިވެ އެވެ. އަދި އޭނާގެ އަތުގެ މުލައްދަނޑިއަށް އެއްވެސް ބާރެއް ލައިގެން ނުވާނެ ކަމަށާއި ނުވަތަ ކޮނޑާއި އުނަގަނޑާއި ފުރަގަހާއި ފަޔާއި ފުންނާބުގެ ހަރަކާތެއްގެ ބާރު ބޭނުންކޮށްގެން ނުވާނެ ކަމަށްވެސް ގާނޫނުލްއުގޫބާތުގައި ބުނެފައިވެ އެވެ.