"ހޯޕް އައިލެންޑް"ގެ ކުރެހުމުގެ މަސައްކަތް ނިމިއްޖެ ކަމަށް ހޯމްލޭންޑް ސެކިއުރިޓީ މިިނިސްޓަރު އަލީ އިހްސާން ވިދާޅުވެއްޖެ އެވެ.
ސަރުކާރުގެ "ސަރުކާރު" ނޫހަށް ދިން އިންޓަވިއުއެއްގައި ވާހަކަދައްކަވަމުން މިނިސްޓަރު ވިދާޅުވީ ކުރެހުމުގެ މަސައްކަތް މިހާރު ނިމިފައިވާ ކަމަށާއި ފައިސާ ހޯދާނެ ގޮތުގެ މޮޑެލް އިކޮނޮމިކް ކައުންސިލަށް މި ހަފްތާގެ ތެރޭގައި ހުށަހަޅާނެ ކަމަށެވެ.
"ހޯޕް އައިލެންޑް" އަކީ ކުށަށް އަރައިގަންނަ ކުޑަކުދިން ސަލާމަތްކޮށް، އެކުދިން ރިހިބިލިޓޭޓް ކުރުމަށް ހަދަމުންދާ ރަށެކެވެ. އެގޮތުން މި ރަށުގައި 400 އެއްހާ ކުދިން އެއްފަހަރާ ބައިތިއްބާނެ އެވެ.
ހޯމް އައިލެންޑްގެ ގޮތުގައި ކަނޑައަޅާފައިވަނީ ދ. ވާނީ އެވެ.
މި ރަށަށް ގެންދެވޭނީ ކުށުގެ ޒިންމާ އުފުލާ އުމުުރުގެ ކުދިންނެވެ. އަދި އެ ކުދިން 18 އަހަރު ފުރެންދެން އެ ރަށުގައި ބައިތިއްބާނެ އެވެ.
އެ ރަށުގައި ތިބޭއިރު ކުދިންނަށް ދީނުގެ ހަމަތަކާއި އުސޫލުތަކުގެ މަތިން ތަރުބިއްޔަތު ފޯރުކޮށްދީ، އެކި ހުނަރުތައް ދަސްކޮށްދީ، ތައުލީމުވެސް ރަސްމީކޮށް ފޯރުކޯށްދެމުންދާނެ އެވެ.
މިނިސްޓަރު އިހްސާން ވިދާޅުވީ ރަށް ތަރައްގީކުރާނީ އެ ރަށުގައި ތިބޭއިރު އެ ކުދިންނަށް އާއިލާއާ ގުޅުން ބަދަހިކުރެވޭނެ ގޮތަށް ކަމަށެވެ.
އިހްސާން އިތުރަށް ވިދާޅުވީ ކުށްކުރާ ކުދިން އިސްލާހު ކުރުމުގެ ޕްރޮގްރާމްތައް ރިވިއުކޮށް އަލުން އެފަދަ ޕްރޮގްރާމުތައް އެކުލަވާލުމުގެ މަސައްކަތް ކުރަމުންދާ ކަމަށެވެ. އަދި މުޖުތަމައަށް ދޫކޮށްލާނީ 18 އަހަރު ފުރުމުން އެސެސްމެންޓް ހެދުމަށްފަހު ހާއްސަ މޮނިޓަރިން މެކޭނިޒަމެއްގެ ތެރެއިން ކަމަށްވެސް ވިދާޅުވި އެވެ. އެސެސްމަންޓުން ފާސް ނުވާ ކުދިން ދެން ރެކްރޫޓު ކުރެވޭނީ ފުލުހުން ނުވަތަ ސިފައިންގެއަށް ކަމަށްވެސް ވިދާޅުވި އެވެ.