ކްރިމިނަލް ކޯޓުގައި މިއަދު ކުރިއަށް ދަނީ ބަންދު މައްސަލަތަކާއި، ކޯޓު އަމުރުތަކުގެ މައްސަލަތައް އެކަނި ކަމަށް އެ ކޯޓުން ބުނެފި އެވެ.
ކްރިމިނަލް ކޯޓުގެ އާންމު މައްސަލަތައް މިއަދު ނުބާއްވާ ގޮތަށް ނިންމީ ރާއްޖެއަށް މިހާރު ކުރަމުންދާ ވިއްސާރައާ ގުޅިގެން މިއަދު ސަރުކާރު ބަންދުކުރުމުގެ އިތުރުން ވިއްސާރައިގެ ސަބަބުން ކޯޓުގެ އިމާރާތަށް ފެނުގެ އަސަރުކުރަމުންދާތީ ކަމަށް އެ ކޯޓުން ބުންޏެވެ.
މިއަދުގެ ހުރިހާ މައްސަލައެއް ކްރިމިނަލް ކޯޓުން ކެންސަލް ކުރިއިރު، މިދިޔަ ޖުލައި މަހު އެކަނި 1،300 އަށް ވުރެ ގިނަ މައްސަލަ އެ ކޯޓުގައި ތާވަލު ކުރި އެވެ.
މިދިޔަ މަހުގެ ތަފާސް ހިސާބުތަކަށް ބަލާއިރު، އެވްރެޖުކޮށް އެ ކޯޓުގެ ކޮންމެ ސެކްޝަނަކަށް، އަޑު އެހުން ބޭއްވުމަށް 10 ދުވަހު ޝަރީއަތުގެ މާލަން ލިބިފައިވާ ކަމަށް އެ ކޯޓުން ބުންޏެވެ.
ކްރިމިނަލް ކޯޓް ހިންގަމުން ދިޔަ ތީމުގެއާ އިންވެގެން ހުރި އެސްޓީއޯ ކުރީގެ އިމާރާތް ބާވެ ފެން ފޭބުމުގެ އިތުރުން އިމާރާތުގެ އެއްބައި ބޭނުން ނުކުރެވޭ ހިސާބަށް ގޮސްފައިވާތީ މިދިޔަ އަހަރުން ފެށިގެން އެކަށީގެންވާ ގޮތެއްގައި ކްރިމިނަލް ކޯޓުގެ ޝަރީއަތްތަކެއް ކުރިއަކަށް ނުގެންދެވެ އެވެ. އެހެން އެކަން އޮއްވާ ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަމުގެ މައްސަލައަށް ވަގުތީ ހައްލެއް ހޯދުމުގެ ގޮތުން، ހުޅުމާލޭގައި ހުންނަ ސިވިލް ކޯޓުގެ ޑިވިޝަނަށް ކްރިމިނަލް ކޯޓުގެ ބައެއް ޝަރީއަތްތައް ބަދަލު ކުރީ މިއަހަރުގެ ޖޫން މަހުން ފެށިގެންނެވެ.
ހުޅުމާލެއަށް ކްރިމިނަލް ކޯޓުގެ ބައެއް ބަދަލު ކުރުމާއެކު، އެ ކޯޓުގެ މަސައްކަތް ވަނީ ބާރަށް ހިނގައިގެންފަ އެވެ.