މަންމައަށް އަނިޔާކޮށް ބިރު ދައްކައިގެން ފައިސާ ހޯދަން އުޅުނު މައްސަލައިގައި ހައްޔަރުކޮށްފައިވާ މީހާގެ ބަންދު އިތުރުކޮށްފި އެވެ.
މާލެ ސަރަހައްދުގައި ހިނގި މި ހާދިސާއާ ގުޅިގެން ހައްޔަރުކޮށްފައިވަނީ އުމުރުން 40 އަހަރުގެ ދިވެހި ފިރިހެނެކެވެ.
އޭނާ ހައްޔަރުކޮށް ކޯޓަށް ހާޒިރުކުރުމުން ފުރަތަމަ ފަހަރު ހަފްތާއަކަށް އޭނާ ބަންދުކޮށްފައި ބެހެއްޓުމަށް ފަހު އެ މުއްދަތު ހަމަވެގެން އިތުރު އަށް ދުވަހަށް އަނެއްކާވެސް ވަނީ މުއްދަތު އިތުރުކޮށްފަ އެވެ.
މަންމައަށް އަނިޔާކޮށް ބިރު ދައްކައިގެން ފައިސާ ހޯދަން އުޅުނު މީހާގެ މައްޗަށް ކުރާ ތުހުމަތަކީ، ޝަރުއީ ކޯޓެއްގެ އަމުރާއި ހިލާފުވުމުގެ ތުހުމަތެވެ. އެ މީހާގެ މައްޗަށް، ގެވެށި އަނިޔާއިން ރައްކާތެރިކުރުމުގެ އަމުރެއް ފެމިލީ ކޯޓުން ވަނީ ކުރިން ނެރެފަ އެވެ.
މި މީހާގެ ބަންދު އަމުރު ރިޕޯޓުން އެނގޭ ގޮތުގައި އޭނާ ވަނީ އޭނާގެ މަންމައަށް ބިރު ދައްކައި، މަންމަ ގައިގައި ޖަހައި މާރާމާރީ ހިންގައި ގަދަކަމުން ފައިސާ ހޯދަން އުޅެފަ އެވެ. އޭނާ ބަންދުކޮށްފައިވަނީ މުޖުތަމައުގެ ސަލާމަތާ ރައްކާތެރިކަމަށެވެ.
