ރަށްރަށުގެ މަގުބައްތިތައް ސަލާމަތީ މިންގަނޑުތަކާ އެއްގޮތަށް ބަދަލުކުރުމަށް ދިން މުއްދަތު އިތުރުކޮށްފި އެވެ.
ފެނަކައިން ބުނީ ރަށްރަށުގެ މަގު ބައްތިތައް ޔޫޓިލިޓީ ރެގިއުލޭޓަރީ އޮތޯރިޓީ (ޔޫއާރްއޭ) އިން ކަނޑައަޅާފައިވާ ރައްކާތެރިކަމުގެ ހާއްސަ މިންގަނޑާ އެއްގޮތަށް އިސްލާހުކުރުމަށް ކައުންސިލްތަކަށް ދިން މުއްދަތު އަންނަ އަހަރުގެ ފެބްރުއަރީ މަހަށް ފަސްކޮށްދީފައިވާނެ ކަމަށެވެ.
މިއީ މަގު ބައްތިތައް އިސްލަހުކުރުމަށް ދިން މުއްދަތު ފަސްކުރި ތިންވަނަ ފަހަރެވެ. ފެނަކައިން ވަނީ ދީފައިވާ މުއްދަތުގެ ތެރޭގައި އިސްލާހުނުކޮށްފި ނަމަ އެ ރަށެއްގެ މަގުބައްތިތަކަށް ދޭ ކަަރަންޓު ކަނޑާލާނެ ކަމަށް ކައުންސިލްތަކަށް އަންގާފައިވާނެ ކަމަށްވެސް ބުނެފަ އެވެ.
ފެނަކައިން ބުނީ މުއްދަތު އަނެއްކާވެސް އިތުރުކޮށްދީފައިވަނީ މަގުބައްތިތައް އިސްލާހުކުރުމުގައި ދަތިތަކެއް ހުރި ކަމަށް ކައުންސިލުތަކުން ބުނަމުންދާ ކަމަށެވެ.
ފެނަކައިން ކުރި އިންސްޕެކްޝަނަކުން 144 ރަށެއްގައި މަގުބައްތިތައް ހުރީ ސަލާމަތީ މިންގަނޑުތަކާ ހިލާފަށް ކަން ވަނީ އެނގިފަ އެވެ.
މި މައްސަލަ ބަލަން ފެށީ ރ. އުނގޫފާރުގައި ހުރި މަގުބައްތި ހަރުކޮށްފައިވާ ހޮޅި ދަނޑިއަކުން މަގުމަތީގައި ފެން ހެދިފައި ހުރި ތަނަކަށް ކަރަންޓް ދަތުރުކޮށް އެތަނުގައި ކުޅެން ތިބި ދެ ކުއްޖަކު ކަރަންޓުގައި ޖެހުމުން އެ ކުދިން ސަލާމަތް ކުރަން އުޅުމުގެ ތެރޭގައި ކަރަންޓުގައި ޖެހި ޒުވާނަކު ނިޔާވުމުންނެވެ.