ލ. ގަމުގައި ޑްރަގާއި ބޯގަރު ހުރި ދެ ރުނބައަކާ އެކު ދެ މީހަކު ހައްޔަރުކޮށްފި އެވެ.
މަސްތުވާތަކެތި ގެންގުޅުމާއި ވިއްކުމުގެ އިތުރުން ބޯގަރު ކައްކާ، އޭގެއިން ވިޔަފާރި ކުރާ ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ފުލުހުން އިއްޔެ ވަނީ ލ. ގަން ތުނޑި، ވިލެޖްގެ ބަލައި ފާސްކޮށްފަ އެވެ.
ފުލުހުންގެ މީޑިއާ އޮފިޝަލް ވިދާޅުވީ އެ ގޭ ތެރެއިން 24.42 ގްރާމްގެ ހެރޮއިން ކަމަށް ޝައްކުކުރެވޭ މަސްތުވާތަކެއްޗަކާއި ބޯގަރު ހުރި ކަމަށް ޝައްކުކުރެވޭ ދެ ރުނބާ އަދި ފަސް ލީޓަރުގެ ފުޅިއަކާއި ބޯގަރު ކައްކަން ބޭނުންކުރާ ސާމާނު ފެނިފައިވާ ކަމަށެވެ.
ފުލުހުން ބުނީ މި މައްސަލައިގައި 42 އަހަރުގެ ދިވެހި ފިރެހެނަކާއި 57 އަހަރުގެ ދިވެހި ފިރެހެނެއް ހައްޔަރުކޮށްފައިވާ ކަމަށެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.