ދިރިއުޅުމުގެ ވައްޓަފާޅިން ހޯމޯން އިމްބެލެންސްއަށް ކުރާ އަސަރުގެ މައުލޫމާތު "ހޯމޯންސް އެންޑް ޕްރިޒާވިން ޔޫތު" ފޮތް ނެރެފި އެވެ.
އެންޑޮކްރިނޮލޮޖިސްޓް ޕްރޮފެސަރު މާރިޔާ ރުސަލެންކޯ އާއި ޑރ. މުހައްމަދު ވިޝާމް ލިޔުއްވި މި ފޮތް ލޯންޗްކުރީ އާޓް ގެލެރީގައި އިއްޔެ ބޭއްވި ރަސްމިއްޔާތެއްގަ އެވެ. މިފޮތް އިފްތިތާހުކޮށް ދެއްވީ ހެލްތު މިނިސްޓްރީގެ ސްޓޭޓް މިނިސްޓަރު ހަދީޖާ އަބްދުއްސަމަދު އަބްދުﷲ އެވެ.
ދުޅަހެޔޮ ދިރިއުޅުމެއް ދެމެހެއްޓުމުގައި ދިރިއުޅުމުގެ ވައްޓަފާޅީގެ މުހިންމުކަމާއި ދިރިއުޅުމުގެ ވައްޓަފާޅިން ހޯމޯން އިމްބެލެންސްއަށް ކުރާ އަސަރުތައް މި ފޮތުގައި ހިމަނާފައިވެ އެވެ.
މީގެ އިތުރުން ހޯމޯންސްއާ ގުޅޭ މައްސަލަތަކާއި ސްޓްރެސް އަދި އުމުރުން ދުވަސްވުމުން ކުރާ އަސަރުތަކުގެ މައުލޫމާތު މި ފޮތުގައި ހިމަނާފައިވެ އެވެ.
މި ފޮތް ފުރަތަމަ ލޯންޗްކުރީ ފެބްރުއަރީ 2023 ގައި ބެލަރޫސްގަ އެވެ. ރާއްޖެއަކީ މި ފޮތް ލޯންޗުކުރި ދެވަނަ ގައުމެވެ.
ރަޝިއާ ބަހާއި އިނގިރޭސި ބަހުން ޝާއިއުކޮށްފައިވާ މި ފޮތް އެމެޒޮން އަދި އޮޑިބަލް އިން ލިބޭނެ އެވެ.
ފޮތް ލޯންޗްކުރުމުގެ ރަސްމިއްޔާތުގައި ފޮތުގެ މުސައްނިފު ވަނީ ފަލަވުމާއި ދަރިމައިނުވުމުގެ މައްސަލަތައް އިތުރުވެފައިވާކަން ފާހަގަކުރައްވާފަ އެވެ.
މީޑިއާތަކަށް މައުލޫމާތު ދެއްވަމުން ޑރ. ވިޝާމް ވިދާޅުވީ މިއީ ދިވެހި މުޖުތަމައަށް އެހީވުމުގެ ގޮތުން ކުރި ކަމެއް ކަމަށެވެ.
މި ފޮތް ލޯންޗުކުރުމުގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ މެޑިކަލް ސާވިސް އަދި ބެލަރޫސް މޯލްޑިވްސް ކަލްޗަރަލް ސެންޓަރުން ވެދިން އެހީތެރިކަމަށް އޭނާ ޝުކުރު އަދާކުރެއްވި އެވެ.
މި ފޮތް ވިއްކައިގެން ލިބޭ އާމްދަނީ ހަދިޔާކުރުމަށް ހަމަޖެހިފައިވަނީ ރާއްޖޭގައި އިންސާނީ އެހީދޭ ޖަމިއްޔާއަކަށެވެ.
މީގެ އިތުރުން ޑރ. މާރިޔާ އަދި ޑރ. މުހައްމަދު ވިޝާމްއާ ބައްދަލުކޮށް މެޓަބޮލިކް ޑިސްއޯޑާސްއާ ބެހޭ ގޮތުން އާންމުން މަޝްވަރާކުރުމުގެ ސެޝަންތަކެއް މިމަހުގެ 17 އިން 21 އަށް ކޮންމެ ދުވަހެއްގެ ހެނދުނު 10:00 އިން ހަވީރު 5:00 އަށް ނެޝަނަލް އާޓް ގެލެރީގައި ކުރިއަށް ގެންދިއުމަށް ވަނީ ހަމަޖެހިފަ އެވެ.