ރާއްޖޭގައި އެވްޓޯލް ޖެއްސުމަށް ހާއްސަ ވާޓިޕޯޓާއި ޑްރޯންޕޯޓްތަކެއް ހެދުމަށްޓަކައި ރާއްޖޭގެ ރީޖަނަލް އެއާޕޯޓްސް ކުންފުނި -- އާރްއޭސީއެލް އިން ދުބާއީގެ ދެ ކުންފުންޏަކާ އެކު ޕާޓްނަޝިޕް އެއްބަސްވުމެއްގައި ސޮއިކޮށްފި އެވެ.
ރީޖަނަލް އެއާޕޯޓްސް ކުންފުނިން މިމަސައްކަތް ކުރިއަށް ގެންދިއުމަށް ނިންމާފައިވަނީ އެވިއޭޝަން ދާއިރާގައި ފާހަގަކުރެވޭ ދުބާއީގެ ވިންގް ކެޕިޓަލް މެނޭޖްމަންޓާއި އެއާ ޝެޓޯ ޑީޑަބްލިއުސީއާ ގުޅިގެންނެވެ.
ބޭރުގެ ބައެއް ނޫސްތަކުގައި ރިޕޯޓްކޮށްފައިވާ ގޮތުގައި މިމަޝްރޫއުގެ ދަށުން ރާއްޖޭގައި އެވްޓޯލް ޖެއްސުމަށް ހާއްސަ ވާޓިޕޯޓާއި ޑްރޯންޕޯޓްތަކެއް ހެދުމުގެ އިތުރުން އެއާ ޓެކްސީ އޮޕަރޭޝަނާއި ކޮމާޝަލް ކާގޯ އާއި ޕެސެންޖާ އޮޕަރޭޝަންސްގެ ހިދުމަތް ދޭނެ އެވެ.
މިމަޝްރޫއުގެ ދަށުން ރާއްޖޭގެ އެކި ސަރަހައްދުތަކުގައި 500 ޑްރޯންޕޯޓާއި 100 އެއްހާ ވާޓިޕޯޓް ހަދާނެ ކަމަށްވެ އެވެ. މިއީ އިލެކްޓްރިކް އުޅަނދުތަކަށް ހާއްސަ ތަންތަނެވެ.
ދުބާއީގެ ނޫހަކަށް ދެއްވި އިންޓަވިއުއެއްގައި އެއާ ޝެޓޯގެ ޗެއާޕާސަން ޑރ. ސާމިރު މުހައްމަދު ވިދާޅުވީ ރާއްޖެއަކީ ފަތުރުވެރިކަމުގެ ދާއިރާގައި މަޝްހޫރު ގައުމަކަށްވާތީ މިހާރަށް ވުރެ ފަސޭހައިން ފަތުރުވެރިންނަށް ދަތުރުކުރެވޭނެ ގޮތްތަކެއް ރާއްޖޭގައި ހަމަޖެހިފައި ހުރުން މުހިއްމު ކަމަށް ދެކޭ ކަމަށެވެ.
ރާއްޖޭގެ ރީޖަނަލް އެއާޕޯޓްސް ކުންފުނިން ބުނީ އެ ކުންފުނިން އެއާ ޝަޓޯއާއި ވިންގް ކެޕިޓަލް މެނޭޖްމަންޓާ އެކު އެމްއޯޔޫއެއްގައި ސޮއި ކުރީ ޓްރާސްޕޯޓް މިނިސްޓްރީން ރާއްޖޭގައި އެއްތަނުން އަނެއް ތަނަށް ފަތުރުވެރިން އުފުލުން ހިމެނޭ ގޮތަށް ހެލިކޮޕްޓަރު ހިދުމަތް ދޭން ޝައުގުވެރިވާ ފަރާތްތަކުން ޝައުގުވެރިކަން ފާޅުކުރުމަށް ހުޅުވާލި ފުރުސަތުގެ ދަށުން އާރްއޭސީއެލް އިންވެސް ޝައުގުވެރިކަން ފާޅުކުރުމުގެ ގޮތުން ކަމަށެވެ.
"މިކަމުގައި އެއްވެސް ފަރާތަކާއި އެއްކޮށް ރާއްޖޭގައި ހެލިކޮޕްޓަރުގެ ހިދުމަތް ދިނުމަށް އެއްވެސް އެގްރިމެންޓެއްގައި ސޮއި ކުރެވިފައި ނުވާނެ ކަމުގައި ދަންނަވަމެވެ. އަދި ޓްރާންސްޕޯޓް މިނިސްޓްރީއިން އާރްއޭސީއެލްއަށް ހެލިކޮޕްޓަރުގެ ހިދުމަތް ދިނުމަށް ހަވާލުކުރެވިފައި ނުވާކަންވެސް މިފުރުސަތުގައި ފާހަގަކޮށްލަމެވެ." އާރްއޭސީއެލްގެ ބަޔާނެއްގައިވެ އެވެ.