ރާއްޖޭގައި ފުޅާދާއިރާއެއްގައި ސެލޫން ހިންގަމުން ދިޔަ މަޝްހޫރު ދެ ބިދޭސީއަކު ރާއްޖެއަށް ނާދެވޭ ގޮތަށް ޑިޕޯޓްކޮށްލައިފި އެވެ.
ގަވައިދާ ހިލާފަށް ރާއްޖޭގައި އުޅޭ ބިދޭސީން އަތުލައިގަތުމަށް އިމިގްރޭޝަނުން ކުރިއަށް ގެންދާ ސިލްސިލާ އޮޕަރޭޝަންތަކުގެ ތެރެއިން މި ފަހަރު އަތުލައިގަތީ ރާއްޖޭގައި ގަވާއިދާ ހިލާފަށް ވިޔަފާރި ކުރަމުން ދިޔަ "ރިޓްޒް ބިއުޓީ ސެލޫން"ގެ ރަޖަނީ ޝްރެސްތާ (ރިޒް)އާއި، ސުޒޫ ބިއުޓީ ސެލޫންގެ ސުޝްމިތާ ދައުގޯދާ (ސުޒޫ) އެވެ.
މޯލްޑިވްސް އިމިގްރޭޝަނުން ބުނީ ރިޒް އެ އިދާރާގެ ބެލުމުގެ ދަށަށް މިމަހުގެ 11 ވަނަ ދުވަހު "އިމިގްރޭޝަން ވޮޗް"އަށް ލިބުނު މައުލޫމާތަކާ ގުޅިގެން ކުރިއަށް ގެންދިޔަ ހާއްސަ އިންސްޕެކްޝަނެއްގެ ތެރެއިން ކަމަށެވެ.
"އެގޮތުން މި ބިދޭސީ ފަރާތަކީ އޭނައަށް ދޫކޮށްފައިވާ ހުއްދައިގެ (ވިސާ)ގެ ބޭރުން ގަވާއިދާ ހިލާފަށް ވިޔަފާރިކުރަމުން ދިޔަ ފަރާތެއްކަން ވަނީ އެނގިފައި،" އިމިގްރޭޝަނުން ބުންޏެވެ.
އެ އިދާރާ އިން ބުނީ ރިޒްއާއި އޭނާގެ ހަތަރު ބިދޭސީ މުވައްޒަފުންގެ ސައްހަ ވިސާއެއް ނެތުމުގެ ސަބަބުން ރާއްޖެއަށް ނާދެވޭ ގޮތަށް އެ އެންމެން ޑިޕޯޓްކޮށްލީ މިމަހުގެ 13 ވަނަ ދުވަހު އެވެ.
މޯލްޑިވްސް އިމިގްރޭޝަނުން ބުނީ ސުޒޫ އެ އިދާރާގެ ބެލުމުގެ ދަށަށް ގެނެވުނީ މިމަހުގެ 18 ވަނަ ދުވަހު ކަމަށެވެ. އެގޮތުން ސުޒޫއަކީ އޭނާއަށް ދޫކޮށްފައިވާ ހުއްދައިގެ ވިސާގެ ބޭރުން ގަވާއިދާ ހިލާފަށް ވިޔަފާރިކުރަމުން ދިޔަ ފަރާތަކަށް އޭނާ ޑިޕޯޓްކޮށްލީ މިމަހުގެ 20 ވަނަ ދުވަހު ކަމަށްވެސް އިމިގްރޭޝަނުން ބުންޏެވެ.