ރާއްޖޭގައި އަލަށް ގާއިމުކުރާ ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް (ޑީބީއެމްއެލް)ގެ ސީއީއޯ އާއި ޗެއާޕާސަންގެ މަގާމަށް ދެ ތަޖުރިބާކާރަކު އައްޔަންކުރައްވައިފި އެވެ.
އެގޮތުން ބޭންކުގެ ސީއީއޯގެ މަގާމަށް އައްޔަންކުރައްވާފައިވަނީ އިނގިރޭސިވިލާތުގެ ނޮއެލް ގްރެގާ އެވެ. އަދި ޗެއާމަންގެ މަގާމަށް އައްޔަންކުރައްވާފައިވަނީ ސިންގަޕޫރުގެ އަރޫނީ ގުނިޓެލެކީ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވަނީ މި ދެބޭފުޅުންނާ ބައްދަލުކުރައްވާފަ އެވެ.
މި ބައްދަލުވުމުގައި ރައީސް ވަނީ ޗެއާމަންއާއި ސީއީއޯއާއެކު ރާއްޖޭގެ އިގްތިސާދު ހަރުދަނާކޮށް، ފުޅާކުރާނެ ގޮތްތަކުގެ މަޝްވަރާތަކެއް ކުރައްވާފަ އެވެ.
ބޭންކުގެ ޗެއާޕާސަންގެ މަގާމަށް އައްޔަންކުރެއްވި އަރޫނީއަކީ ބައިނަލްއަގްވާމީ މާލީ މާކެޓުގައި 25 އަހަރަށް ވުރެ ގިނަ އަހަރުގެ ތަޖުރިބާ ލިބިވަޑައިގެން ހުންނެވި މާލީ ދާއިރާގެ މާހިރެކެވެ.
ރައީސް އޮފީހުން ބުނީ އާނާއަކީ ބިޒްނަސް އޮރިޖިނޭޝަނާއި، ގަވާނެންސް، ކްރެޑިޓް އެސެސްމަންޓާއި، ކުރިއަރަމުން އަންނަ މާކެޓުތަކުގައި ރިސްކް މެނޭޖްމަންޓަށް ހާއްސަ ބޭފުޅެއް ކަމަށެވެ.
މީގެ ކުރިން ޗެއާމަން ވަނީ ސްރީލަންކާގެ ބޭންކު ތަކުގައިވެސް އެ ދާއިރާތަކުން މަސައްކަތް ކުރައްވާފަ އެވެ. އަދި ތައުލީމީ ރޮނގުން ހާވާޑް ޔުނިވާސިޓީން ގާނޫނީ ދާއިރާ އިން މާސްޓާސް ވެސް ހާސިލްކުރައްވާފަ އެވެ.
ސީއީއޯގެ މަގާމަށް އައްޔަންކުރެއްވި ނޮއެލް އަކީ ސައުދި އަރަބިއާގެ ނެޝަނަލް އިންފްރާސްޓްރަކްޗާ ފަންޑުގައި ޗީފް އިންވެސްޓްމަންޓް އޮފިސަރުގެ މަގާމު ވެސް ފުރުއްވާފައިވާ، ގްރީން އިންވެސްޓްމަންޓުގައި މުހިއްމު ދައުރެއް އަދާކުރައްވާފައިވާ ބޭފުޅެކެވެ.
މީގެއިތުރުން އޭނާއަކީ އިލެކްޓްރިކް ވެހިކަލް އެފްރިކާގެ ޗެއާމަން އެވެ. އަދި ގްރީން ފައިނޭންސާއި އިންފްރާސްޓްރަކްޗާ ޑިވެލޮޕްމަންޓުގެ ތަޖުރިބާއާއެކު ދެކުނުއިރުމަތި އޭޝިއާގައި ސާފު ހަކަތައިގެ މަޝްރޫއުތައް މެނޭޖުކުރައްވާ ބޭފުޅެކެވެ. އޭނާ ތައުލީމު ހާސިލް ކުރައްވާފައިވަނީ ޔޫކޭގެ އޮކްސްފޯޑް ޔުނިވާސިޓީން މާސްޓާ އޮފް ފިލޯސަފީ (އެމްޕީއެލް) އިންނެވެ.
ރާއްޖޭގައި ފުރަތަމަ ފަހަރަށް ޑެވެލޮޕްމަންޓް ބޭންކު ގާއިމުކުރީ މެއި މަހުގެ 16 ވަނަ ދުވަހު އެވެ. މިއީ ރައީސް ޑރ. މުއިއްޒުގެ ރިޔާސީ ވައުދެކެވެ.